Fréttir og greinar

12. nóvember 2013

Jólaundirbúningur í bústað

Kjarnaskogur Orlofshús SFR standa félagsmönnum til boða jafnt sumar sem vetur. Það eru margir sem njóta þess að slaka á í vetrarkyrrðinni fjarri skarkala bæja og borgar. Sumir taka jafnvel til föndurdótið og undirbúa jólin í bústað. Við hvetjum félagsmenn til að kíkja inn á orlofsvefinn því þar má sjá nokkrar lausar helgar í húsum félagsins í nóvember og desember. Til dæmis er laust í Munaðarnesi og á Arnarstapa um næstu helgi og einnig í okkar glæsilegu íbúðum á Akureyri og í Kjarnaskógi.

11. nóvember 2013

Tillögur hagræðingarhóps ríkisstjórnarinnar birtar

Hagræðingartillögur ríkisstjórnarinnar voru birtar í dag. Þær voru unnar af fjórum þingmönnum, þeim Guðlaugi Þór Þórðarsyni, Vigdísi Hauksdóttur, Unni Brá Konráðsdóttur og Ásmundi Einari Daðasyni sem jafnframt var formaður hópsins. Tillögurnar voru kynntar á þingflokksfundum í dag og reikna má með því að einhverjar þeirra muni skila sér inn í breytingatillögur fjárlaganefndar við fjárlagafrumvarpið. Önnur umræða um fjárlagafrumvarpið á að fara fram 3. desember. Á vef Forsætisráðuneytis má finna tillögurnar í heild sinni.

08. nóvember 2013

nóvember - dagur gegn einelti

Dagurinn 8. nóvember er helgaður baráttunni gegn einelti í samfélaginu. Markmiðið með deginum er að vekja sérstaka athygli á málefninu og hversu alvarlegt einelti er. Í tengslum við baráttudaginn 2011 undirituðu fulltrúar stjórnvalda, sveitarfélaga, félagasamtaka og opinberra stofnana þjóðarsáttmála gegn einelti og lýstu þar með vilja sinum til að leggja þessu málefni lið.

07. nóvember 2013

Kjarasamningsviðræður formlega hafnar

Nú stendur yfir fyrsti formlegi fundur samninganefndar SFR og ríkisins hjá sáttasemjara. Þar hefur kröfugerð félagsins verið kynnt og áhersluatriði félagsins dregin fram.

07. nóvember 2013

Síðustu forvöð að skrá sig á Rekspöl 1 - hefst 15.11

Fræðslusetrið Starfsmennt ayglýsir síðustu forvöð að skrá sig á Rekspöl sem hefst 15. nóv. nk. Á námskeiðinu er rætt um tengsl einstaklings, vinnunnar og samfélagsins. Námið er almenns eðlis, fjölbreytt og víða komið við. Námskeiðið stendur frá 15. - 22. nóv. og verður kennt á hverjum degi frá kl. 8.30-15.55.

04. nóvember 2013

Fordómar og þekkingarleysi

Í morgunblaðinu í dag er fjallað um fækkun ríkisstarfsmanna og hagræðingaraðgerðir ríkisstjórnarinnar. Árni Stefán Jónsson, formaður SFR, segir að svo virðist sem sumum stjórnmálamönnum finnist það í lagi að fjalla um fækkun og uppsagnir ríkisstarfsmanna eins og hvert annað hundsbit. „Það að segja upp fólki og kasta því í atvinnuleysispyttinn er stóralvarlegt mál og á aldrei að fjalla um af léttúð.“

31. október 2013

Lífeyrisgáttin - ný upplýsingaleið lífeyrissjóðanna

Lífeyrissjóðir landsins opnuðu í gær aðgang að Lífeyrisgáttinni, nýrri leið sjóðfélaga til að fá á einum stað upplýsingar um áunnin lífeyrisréttindi sín í samtryggingarsjóðum. Þennan dag mun LSR hafa opið til kl. 19 og bjóðum við sjóðfélaga velkomna í hús.

25. október 2013

Netsamband í Munaðarnesi

Eins og gestir í Munaðarnesi hafa væntanlega orðið varir við þá hefur netsamband þar alls ekki verið nógu gott. Rekstrarfélag orlofshúsanna í Munaðarnesi er nú í viðræðum við Vodafone um að koma upp 4G netsambandi í Munaðarnesi. Það mun vonandi ganga fljótt og vel fyrir sig og mun verða auglýst þegar það er frágengið.

25. október 2013

Málþing BSRB um mikilvægi öflugrar heilbrigðisþjónustu

Málþing um mikilvægi öflugrar heilbrigðisþjónustu og þann mannauð sem þar starfar verður haldið á vegum BSRB að Grettisgötu 89, þann 31. október 2013. Dagskráin hefst kl. 13:00 með setningu formanns BSRB og svo mun heilbrigðisráðherra flytja ávarp. Málþingið er öllum opið.

Ráðstefnan er öllum opin en á dagskrá er meðal annars hugleiðing Rúnars Vilhjálmssonar um árangursríka heilbrigðisþjónustu, erindi Önnu Stefánsdóttur, fyrrverandi hjúkrunarforstjóra Landspítala, um mannauð heilbrigðisþjónustunnar og þverfaglega samvinnu. Einnig mun Sigríður Ingibjörg, formaður velfeðarnefndar alþingis, flytja erindi sem hún kallar Gerir alþingi sér grein fyrir stöðu heilbrigðismála í dag.

Dagskrá fundarins verður send út á vefnum fyrir þá sem ekki komast á staðinn og upptaka af fundinum verður sömuleiðis aðgengileg á vef að honum loknum.

24. október 2013

Starfsfólk Sjúkratrygginga krefst launaleiðréttingar

Á fjölmennum fundi starfsfólks Sjúkratrygginga Íslands í gær kom fram mikil óánægja með viðhorf stjórnenda stofnunarinnar til sanngjarnar launaleiðréttingar. Unnið hefur verið að nýjum stofnanasamningi síðan fyrri hluta árs 2013 en ekkert gengið. Alls starfa um 50 félagsmenn SFR hjá Sjúkratryggingum Íslands og voru rúmlega 40 þeirra á fundinum.