Fréttir og greinar

28. mars 2014

Atkvæðagreiðsla um verkfallsaðgerðir gegn Isavia

Mikið fjölmenni var á baráttufundi starfsmanna hjá Isavia í Reykjanesbæ í gær. SFR stéttarfélag, FFR og LSS boðuðu til fundarins til þess að kynna fyrirhugaðar verkfallsaðgerðir. Mikill hugur var í fundarmönnum og eindreginn stuðningur við samninganefndir félaganna.

28. mars 2014

BSRB gerir samkomulag við ríkið

BSRB og samninganefnd ríkisins undirrituðu í gærkvöld samkomulag í húsnæði ríkissáttasemjara. Samkomulagið fjallar um þau sameiginlegu mál sem aðildarfélög BSRB höfðu falið bandalaginu að semja um.

Þar er m.a. fjallað um forsendur kjarasamninga og bætt vinnubrögð við gerð kjarasamninga. Þá eru aðilar sammála um að farið verði í að þróa aðferðafræði við að meta laun og launaþróun á opinberum og almennum vinnumarkaði. Þegar niðurstöður slíkrar vinnu liggja fyrir munu aðilar samkvæmt samkomulaginu taka til umfjöllunar með hvaða hætti sé hægt að nýta þá aðferðafræði til að draga úr launamun á milli markaða og með hvaða hætti samspil launaákvarðana á almennum og opinberum vinnumarkaði verði metið svo launaþróun milli markaða haldist í hendur.

28. mars 2014

Samninganefnd SFR undirritaði samning við ríkið

Samninganefnd SFR stéttarfélags í almannaþjónustu skrifaði undir kjarasamning við ríkið seint í gærkvöld. Samningurinn gildir frá 1. mars 2014 til 30. apríl 2015 og byggir að hluta til á þeim samningum sem þegar hafa verið undirritaðar með 2,8% launahækkun eða 8 þúsund frá og með 1. mars 2014. Á launataxta sem eru lægri en 230.000,- komi þó sérstök hækkun til viðbótar um 1.750,-

Þá var samið um tvær eingreiðslur, 14.600 við samþykkt kjarasamnings og 20 þúsund í lok samnings 1. apríl 2015, vegna gildistíma samnings. Orlofsuppbót verður 39.500,- og persónuuppbót (desember) verður 73.600,- en það er hækkun upp á 32.300. Einnig er að finna í samningnum ýmis mikilvæg atriði sem SFR hefur lagt áherslur á í sinni kröfugerð s.s. varðandi vaktavinnu, nám, starfsþróun og ferðir til og frá vinnu. Samningurinn verður kynntur félagsmönnum um allt land á næstu dögum og verður það auglýst nánar síðar. Atkvæðagreiðslu um samninginn mun ljúka fyrir miðjan apríl.

27. mars 2014

Trúnaðarmenn ársins eru tveir

Venja hefur skapast á aðalfundi félagsins að kynna þar trúnaðarmann ársins. Á fundinum í gær brá hins vegar svo við að tveir trúnaðarmenn voru valdir. Þetta eru þær Ingibjörg Óskarsdóttir og Ína Jónasdóttir. Báðar hafa þær gegnt trúnaðarstörfum fyrir félagið um árabil, setið í stjórn og verið varaformenn. Formaður félagsins Árni Stefán Jónsson sagði af þessu tilefni að stjórn félagsins hefði fundist með öllu ómögulegt að velja á milli þessara tveggja kvenna og því hafi verið ákveðið að bregða út af venjunni og heiðra þær báðar. SFR óskar þeim til hamingju og þakkar ötult starf í þágu félagsins hingað til, enda kom það fram í þakkarræðum þeirra beggja að þær væru hvergi nærri hættar afskiptum af félagsstörfum hjá félaginu.

27. mars 2014

Ný stjórn kosin á aðalfundi SFR

Á fjölmennum aðalfundi SFR í gær var kosin ný stjórn félagsins. Árni Stefán Jónsson var sjálfkjörinn sem formaður til næstu þriggja ára samkvæmt nýjum lögum félagsins. Auk hans sitja áfram þau Bryndís Theódórsdóttir frá Vinnumálastofnun, Hildur Kristín Ásmundsdóttir frá Isavia, Jóhanna Sóley Gunnarsdóttir frá Landspítala, Jóhanna Vilhjálmsdóttir frá Fiskistofu, Salóme Berglind Guðmundsdóttir frá Fangelsismálastofnun og Sigurður H. Helgason frá Tilraunastöð háskólans að Keldum.

Auk þeirra voru kosin ný inn í stjórn þau Viðar Ernir Axelsson frá Landhelgisgæslu Íslands, Gunnar Garðarsson frá Vegagerðinni, Sigurlaug Hrefna Sverrisdóttir frá Háskóla Íslands og Þórey Einarsdóttir frá Sjálfsbjargarheimilinu. Stjórnin mun skipta með sér verkum á sínum fyrsta fundi og þá kemur m.a. í ljós hver mun gegna varaformennsku í félaginu.

26. mars 2014

Fjölmennur aðalfundur SFR stendur nú yfir

Nú stendur yfir fjölmennur aðalfundur SFR. Formaður félagsins Árni Stefán Jónsson kynnti skýrslu stjórnar og framkvæmdastjóri SFR hefur farið yfir ársreikninga félagsins. Þá eru einnig til umræðu lagabreytingar. Fundurinn hófst kl. 17 í dag en hann sitja um 100 félagsmenn SFR. Fyrr í dag hélt trúnaðarmannaráð fund þar sem m.a. var fjallað um framtíðarstefnu í málefnum trúnaðarmanna.

 

25. mars 2014

Kjarasamningsviðræður SFR, FFR og LSS við Isavia í hnút - fundur um boðaðar aðgerðir

Félag flugmálastarfsmanna ríkisins (FFR), SFR stéttarfélag í almannaþjónustu og Landssamband slökkviliðs- og sjúkraflutningamanna (LSS) hafa verið í samningaviðræðum við Isavia undanfarnar vikur um gerð nýs kjarasamnings. Félögin vísuðu málinu til ríkissáttasemjara eftir að fullreynt var að ekki næðist saman milli félaganna og Isavia. Undir handleiðslu ríkissáttasemjara hefur verið unnið að samningsgrunni sem félögin töldu að hægt væri að byggja hugsanlegar viðræður og samkomulag á. Í dag hefur félögunum hins vegar borist fréttir af því frá viðsemjanda að til þess að vinna frekar á þeim samningsgrunni yrði sett það skilyrði að samningurinn yrði lengdur verulega  eða um 7 mánuði, sem þýddi að samningstíminn væri þá orðinn 19 mánuðir.

20. mars 2014

Stofnun ársins - svarfrestur framlengdur til 28. mars

Svarfrestur vegna könnunarinnar um Stofnun ársins hefur verið framlengdur til 28. mars. SFR hvetur alla félagsmenn sína til að svara könnuninni. Hún er okkur öllum afar mikilvæg og gefur góða mynd af starfsumhverfi stofnana og starfsánægju. Starfsmenn geta notað niðurstöðurnar til að meta eigin vinnustað í samanburði við aðrar stofnanir og fyrirtæki. Þá geta stjórnendur einnig gert sér góða grein fyrir stöðu starfsmannamála í stofnuninni og hvar þeir standa í samanburði við aðra. Þeir sem svara könnuninni verða sjálfkrafa með í happdrætti þar sem 6 vinningar eru í boði.