Fréttir og greinar

30. maí 2019

Aðalfundur SFR 2

Á dagskrá eru venjubundi aðalfundarstörf. Allir félagsmenn eru velkomnir, boðið verður upp á léttan kvöldverð.

28. maí 2019

Uppsagnir hjá Isavia

Isavia hefur í dag sagt upp hópi starfsmanna sem starfa á Keflavíkurflugvelli við öryggisleit og farþegaþjónustu. Flestir starfsmannanna eru félagsmenn Sameykis og félagið hefur verið í viðræðum við Isavia um málið. Ástæður uppsagnanna eru að sögn Isavía breytingar á rekstrarumhverfi Keflavíkurflugvallar m.a. í kjölfar gjaldþrota WOW og breytinga á flugáætlunum Icelandair. Umsvifin í þjónustu vegna millilandaflugs verða af þessum sökum minni en áætlað var.

Uppsagnirnar eru afar þungbærar fyrir starfsmenn og mun stéttarfélagið aðstoða þá eftir megni í framhaldinu. Í viðræðum við Isavía hefur verið leitast við að milda afleiðingar þeirra.

27. maí 2019

Orlofsuppbót í júní

Orlofsuppbót verður greidd út með launum 1. júní hjá félagsmönnum sem starfa hjá ríki, Reykjavíkurborg og fleirum. Ríki og Reykjavíkurborg munu greiða 50.000 kr. eða sömu krónutölu og samið var um á almennum markaði.
Samkvæmt kjarasamningi við Samband íslenskra sveitarfélaga þá var orlofsuppbót hins vegar greidd út 1. maí og fór upphæðin eftir greiðslu fyrir árið 2018 í kjarasamningi eða 48.000 kr. og verður svo leiðrétt um þá hækkun sem um verður samið.

24. maí 2019

Nýjar íbúðir í Hraunbæ

Formaður Sameykis, Árni Stefán Jónsson sem jafnframt er stjórnarformaður Íbúðafélagsins Bjargs tók ásamt Degi Eggertssyni borgarstjóra og fulltrúum Bjargs og ÍAV nú í dag skóflustungu að nýjum íbúðum í Hraunbæ í Reykjavík. Þar munu verða byggðar 99 íbúðir í fjórum húsum sem verða tvær til fimm hæðir. Áætlað er að ljúka við byggingu þeirra í byrjun árs 2021.
Á næstu vikum munu fyrstu íbúarnir flytja inn í 150 íbúðir Bjargs, á Móavegi í Grafarvogi. Framkvæmdir við þær hófust í byrjun árs 2018. Fram undan eru síðan tvö önnur ný verkefni við Kirkjusand og Leirtjörnina í Úlfarsárdal. Tæplega 300 íbúðir eru nú í byggingu hjá íbúðafélaginu og verða þær yfir 500 í haust.

23. maí 2019

Sumarferðir lífeyrisdeildar

Sumarferð félaga í lífeyrisdeild / eftirlaunadeild Sameykis verður á sínum stað í sumar. Að þessu sinni verða farnar tvær ferðir í Hvalfjörð og Borgarfjörð. Ferðirnar eru alveg eins og í báðum ferðum verðum við með tvær stórar rútur. Fyrri ferðin er miðvikudaginn 26. og hin fimmtudaginn 27. júní. Þetta er gert til þess að fleiri geta komið með og því er ekki leyfilegt að skrá sig báða dagana.
Blað lífeyrisdeildar ætti að vera að detta inn um lúguna hjá flestum sem þar eru skráðir og þar má finna ítarlega lýsingu á ferðinni. Verðið er 6000 kr. og innifalið í því er fararstjórn, léttur hádegisverður, kaffihressing og kvöldverður.

22. maí 2019

BSRB í viðræðum um styttingu vinnuvikunnar

Viðræðunefnd BSRB sem hefur samningsumboð aðildarfélaga bandalagsins til þess að fjalla um styttingu vinnuvikunnar hefur fundað síðustu vikur með stærstu viðsemjendum, þ.e. bæði ríki, Reykjavíkurborg og Sambandi íslenskra sveitarfélaga. Í viðræðunefndinni eru ásamt formanni BSRB, Sonju Ýr Þorbergsdóttur, Árni Stefán Jónsson formaður Sameykis, Garðari Hilmarssyni varaformanni Sameykis og fleirum úr stjórn BSRB. Viðræður ganga hægt og nokkur ágreiningur er um leiðir að því markmiði að stytta vinnuvikuna.

22. maí 2019

Viðræður samninganefnda Sameykis

Viðræður eru hafnar við flesta viðsemjendur Sameykis. Þeir stærstu eru ríkið, Reykjavíkurborg og Samband íslenskra sveitarfélaga. Þó nokkrir fundir hafa verið haldnir og viðræðurnar hafa snúist um styttingu vinnuvikunnar, launaliði auk ýmissa réttindamála. Það er félaginu vonbrigði að viðræðurnar ganga mun hægar en vonir stóðu til. Stefnt hefur verið að því að ljúka samningum fyrir sumarið og vonandi mun það nást. Á fimmtudaginn 23. maí er næsti fundur bókaður í kjaraviðræðum við Isavía.
Þeir kjarasamningar sem hafa verið lausir frá áramótum eru við Orkuveituna og Fríhöfnina en þar eru viðræður heldur ekki komnir lengra á veg.

20. maí 2019

Er allt að kafna úr stressi í vinnunni?

Spurningunni í þessari yfirskrift málþings Sameykis sem haldið var í tengslum við Stofnun ársins í gær geta því miður margir svarað játandi. Könnun Sameykis sýnir að mun fleiri upplifa álag og streitueinkenni nú en áður og því var ákveðið að bjóða forstöðumönnum stofnana, mannauðsstjórum og fulltrúum Sameykis og annarra opinberra stéttarfélaga á málþing um efnið. Helgi Héðinsson sálfræðingur hjá Lífi og Sál fjallaði í upphafi um muninn á milli streitu og kulnunar og lagði áherslu á að örlítil streita í stuttan tíma væri ekki hættuleg. Stuttu streitu- eða álagstímabili mætti jafnvel líkja við það þegar fólk æfir stíft líkamsrækt. Það væri hollt en hvíldin væri jafn mikilvæg fyrir andlegu hliðina og þá líkamlegu. Löng streitutímabil væru hættuleg og gætu leitt til veikinda og því væri mikilvægt að vinna markvisst að því að lágmarka streituvalda í umhverfinu okkur og tryggja að við fengjum næga hvíld á milli, að við gefum okkur tíma til að hvíla líkama og huga.

16. maí 2019

Sameyki styrkir mannauðsrannsóknir

Bryndís Theódórsdóttir MA nemi í opinberri stjórnsýslu hlaut í gær styrk frá Sameyki stéttarfélagi upp á 750 þúsund til þess að rannsaka tengsl vinnuumhverfis og veikindafjarvista kvenna hjá ríkinu. Til þessa mun hún nýta niðurstöður úr könnununum um Stofnun ársins síðastliðin ár og að bera saman þær niðurstöður við veikindafjarvistir starfsmanna sömu stofnana og skoða hvort fylgni sé á milli einhverra þátta og fjölda veikindadaga.

15. maí 2019

Til hamingju Ísland - Stofnanir ársins eru ...

Valið á Stofnun ársins 2019 var kynnt við hátíðlega athöfn á Hilton Nordica fyrr í dag en titlana Stofnun ársins og Fyrirmyndarstofnun hljóta þær stofnanir sem þykja skara fram úr að mati starfsmanna. Valið er byggt á svörum rúmlega 10 þúsund starfsmanna í einni stærstu vinnumarkaðskönnun landsins. Stofnanir ársins 2019 eru Frístundamiðstöðin Tjörnin, Menntaskólinn á Tröllaskaga, Persónuvernd, Skrifstofa velferðarsviðs Reykjavíkurborgar og Ríkisendurskoðun. Hástökkvarar ársins eru Skrifstofa Velferðarsviðs Reykjavíkurborgar og Sýslumaðurinn á Norðurlandi eystra.