Fréttir og greinar

26. febrúar 2020

Fyrsti samningurinn í höfn

Þau gleðilegu tíðindi bárust í dag að búið væri að skrifa undir kjarasamning við Faxaflóahafnir. Sameyki á þar rúmlega tuttugu félagsmenn og var samningurinn samþykktur með yfir 80% atkvæða. Fulltrúar í samninganefnd eru afar ánægðir með samninginn, enda má í honum finna flest þau atriði sem félagið hefur verið að berjast fyrir. Þar er hvergi að finna tvöfalda eða lækkaða yfirvinnuprósentu eins og verið er að bera á borð annars staðar, allir starfsmenn fá 30 daga orlof með möguleika á lengingu, vinnuvikan styttist og allir starfsmenn fá 90 þúsund kr. launahækkun á samningstímabilinu.

25. febrúar 2020

Orðsending frá Landlækni

Vegna útbreiðslu COVID-19 veirunnar hefur landlæknir óskað eftir því að stéttarfélög og heildarsamtök aðstoði við upplýsingamiðlun til félagsmanna sinna en fulltrúar BSRB, ASÍ, BHM og KÍ funduðu með landlæknisembættinu á dögunum vegna þessa. Heildarsamtök og aðildarfélög hafa ákveðna upplýsingaskyldu gagnvart félagsmönnum um ábyrgð, réttindi og skyldur í heimsfaraldri inflúensu þegar um er að ræða óvissustig, hættustig eða neyðarstig. Fyrir allnokkru lýstu íslensk yfirvöld yfir óvissustigi.

24. febrúar 2020

Vinnur þú hjá Stofnun ársins?

Við erum þessa dagana að senda út könnunina um Stofnun ársins og launakönnunina og hvetjum allt okkar fólk til að gefa sér tíma til þess að svara.

Könnunin er unnin af Gallup og við erum í samstarfi við Fjármála- og efnahagsráðuneytið. Okkar fólk fær senda könnun en einnig ríkisstarfsmenn úr öðrum félögum og starfsmenn utan Sameykis á þeim vinnustöðum sem kaupa sig sérstaklega inn í könnuna. Það er því okkar allra hagur að sem fl estir taki þátt og svari. Þannig verða niðurstöðurnar áreiðanlegri og gagnlegri fyrir okkur öll. Könnunin er notuð af stjórnendum og starfsfólki til að laga það sem betur má fara og þeir vinnustaðir sem nýta hana best hafa oftar en ekki verið í efstu sætunum.

20. febrúar 2020

Verkfallsboðun Sameykis samþykkt með afgerandi hætti

Verkfallsboðun félagsmanna Sameykis gagnvart ríki, Reykjavíkurborg, Seltjarnarnesbæ, Akraneskaupstað og Höfða hjúkrunar- og dvalarheimili var samþykkt með miklum meirihluta í atkvæðagreiðslu sem lauk í gærkvöld. Kjörsókn var mjög góð og var allt að 87% hjá ákveðnum hópum. Úrvinnsla atkvæðagreiðslunnar var nokkuð flókin í framkvæmd þar sem hún náði til samninga við fjóra viðsemjendur og greidd voru atkvæði annars vegar um tímabundna vinnustöðvun hjá öllum félagsmönnum á viðkomandi samningum og hins vegar ótímabundna vinnustöðvun hjá ákveðnum stofnunum.

20. febrúar 2020

Yfirgnæfandi meirihluti BSRB félaga samþykkti verkfall

Yfirgnæfandi meirihluti félaga í öllum aðildarfélögum BSRB sem lokið hafa atkvæðagreiðslu um verkfallsboðun samþykkti boðun verkfalls. Verkfallsaðgerðir munu hefjast mánudaginn 9. mars, takist samningar ekki fyrir þann tíma.

19. febrúar 2020

Atkvæðagreiðslu lokið

Atkvæðagreiðslu um verkfallsboðun gagnvart ríki, Reykjavíkurborg, Seltjarnarnesbæ, Akraneskaupstað og Höfða hjúkrunar- og dvalarheimili lauk nú kl. átta í kvöld. Niðurstöður hennar verða birtar hér á vefnum um klukkan ellefu í fyrramálið.

19. febrúar 2020

Síðasti dagur atkvæðagreiðslunnar

Nú á síðasta degi atkvæðagreiðslunnar er staðan nokkuð góð. Stór hluti okkar félagsmanna hefur greitt atkvæði og mikil stemning er víða á vinnustöðum. Við höfum fengið myndir af kosningakaffi á norðurlandi og trúnðarmennirnir okkar hafa víða farið á milli vinnustöðva til að hvetja fólk og aðstoða það við að leita sér upplýsinga. Við stefnum auðvitað á enn betri þátttöku enda enn þó nokkrir klukkutímar þar til atkvæðagreiðslu lýkur. Við hvetjum alla þá sem eiga eftir að greiða atkvæði að gera það sem fyrst. Atkvæðagreiðslan er opin til kl. 20:00 í kvöld en niðurstöður verða birtar fyrir hádegi á morgun.

17. febrúar 2020

Blússandi gangur í atkvæðagreiðslu um verkfall

Atkvæðagreiðslan um boðun verkfalls fór afar vel af stað í morgun, á fyrsta klukkutímanum voru 600 manns búnir að kjósa, og nú um hádegið voru 20% búnir að greiða atkvæði. Í morgun hófst atkvæðagreiðsla um boðun verfalla hjá öllum aðildarfélögum BSRB. Alls eru um 18000 manns sem verkfallsboðunin nær til, 8000 þeirra eru hjá Sameyki stéttarfélagi. Opnuð hefur verið ítarleg upplýsingasíða á íslensku og ensku og er félagsfólk hvatt til að kynna sér hana og greiða atkvæði. Atkvæðagreiðslunni lýkur kl. 20:00 miðvikudaginn 19. feb. 2020.

​

​

15. febrúar 2020

Atkvæðagreiðsla um vinnustöðvun allt að 18 þúsund opinberra starfsmanna

Atkvæðagreiðsla Sameykis og aðildarfélaga BSRB sem semja við ríki og sveitarfélög fer fram dagana 17. til 19. febrúar. Samþykki félagsmenn aðgerðir hefjast þær 9. mars.

14. febrúar 2020

Upplýsingasíða um verkfall og atkvæðagreiðsla

Við höfum sett í loftið ítarlega upplýsingasíðu um yfirvofandi verkfallaðgerðir og atkvæðagreiðslu um boðun þeirra. Við hvetjum félagsmenn til þess að kynna sér málið vel.