Fréttir og greinar

21. júlí 2014

Betur heima setið en af stað farið?

Alma Lísa Jóhannsdóttir skrifar

Þegar til stendur að breyta skipulagi innan stjórnsýslunnar er afar mikilvægt að undirbúa ferlið vel. Reynslan hefur kennt okkur margt og rannsóknir hafa sýnt fram á að ávinningur af slíkum ákvörðunum getur orðið lítill sem enginn ef ekki er staðið vel að málum frá upphafi.

Almennt telst góður undirbúningur og samþætting ólíkra verkefna vera lykilatriði í skipulagsbreytingum. Einnig verður að huga vel að starfsfólki í öllu ferlinu. Ákvörðunin þarf að vera vel ígrunduð og tryggja þarf að hún sé skynsamleg.

09. júlí 2014

Laust í Súðavík

Vegna sérstakra aðstæðna losnaði hús SFR í Súðavík vikuna 25. júlí til 1. ágúst. Áhugasamir geta farið inn á orlofsvef félagsins og bókað húsið.

08. júlí 2014

Blað stéttarfélaganna í prentun

Sumarblað Blaðs stéttarfélaganna sem gefið er út af SFR stéttarfélagi og Starfsmannafélagi Reykjavíkurborgar er nú í prentun og verður dreift til félagsmanna síðar í vikunni. Í blaðinu nú má m.a. lesa um niðurstöður í könnuninni um Stofnun ársins, en farið var í heimsókn til tveggja stofnana sem hlutu titilinn og talað við bæði starfsmenn og forstjóra. Þessar stofnanir eru Orkuveita Reykjavíkur sem var stofnun ársins í flokki stærri stofnana hjá St.Rv. og Sjálfsbjargarheimilið sem var Stofnun ársins hjá SFR í flokki stærstu stofnana.

Í sumarblaðinu hefur einnig nýr greinarflokkur um umhverfismál göngu sína, en í þessari fyrst grein er fjallar Auður Alfífa um plastpokanotkun. Þá fjallar Vésteinn Valgarðsson um verkalýðsmál í Danaveldi og vinningsmyndirnar úr ljósmyndasamkeppni blaðsins eru einnig birtar í blaðinu.

08. júlí 2014

Framvegis heldur áfram þrátt fyrir brunann

SFR á hlut í Framvegis miðstöð um símenntun, ásamt Sjúkraliðafélagi Íslands, Starfsmannafélagi Reykjavíkurborgar og Promennt. Í ljósi atburða síðastliðið sunnudagskvöld vill stjórn og starfsfólk Framvegis koma eftirfarandi skilaboðum á framfæri: Við færum slökkviliði og björgunarfólki einlægar þakkir fyrir frábært og óeigingjarnt starf vegna brunans í Skeifunni. Talsvert tjón varð á húsnæði Framvegis en þó mun minna en útlit var fyrir í fyrstu. Við sjáum því fram á að starfsemi Framvegis hefjist samkvæmt áætlun í haust enda eru mörg spennandi námskeið og verkefni framundan. Skráning á námskeið fer sem áður fram í gegnum vefinn okkar www.framvegis.is.

04. júlí 2014

Samningar í höfn

Gengið hefur verið frá kjarasamningum við Ás styrktarfélag og Samband íslenskra sveitarfélaga. Samningar verða kynntir í næstu viku og rafræn atkvæðagreiðsla verður í kjölfarið.

02. júlí 2014

Hólmavík - vikan 4. til 11. júlí var að losna

Næsta vika á Hólmavík var að losna óvænt af óviðráðanlegum orsökum. Um er að ræða 4. - 11. júlí í einbýlishúsi á einni hæð byggt 1983 samtals 105 fm. Eignin skiptist í fordyri, forstofu með skápum, hol, tvö rúmgóð svefnherbergi, stóra stofu, eldhús með borðkrók, þvottahús inn af eldhúsi og baðherbergi. Úr stofu er gengið út á gróna lóð. Vikan kostar kr. 25.000.

01. júlí 2014

Hópuppsagnir eða hreppaflutningar?

Rétt í þessu lauk fjölmennum fundi starfsmanna Fiskistofu þar sem fyrirhugaður flutningur stofnunarinnar var ræddur. Á fundinn voru mættir fulltrúar þeirra stéttarfélaga sem starfsmenn stofnunarinnar tilheyra. Þungt hljóð var í fólki en meðal umræðuefna voru réttindi fólks til biðlauna, eftirlauna og uppsagnarfrests. Þá voru ástæður ákvörðunarinnar ofarlega í hugum fólks og þær aðferðir sem viðhafðar hafa verið við ákvarðanatökuna. Svo virðist sem ráðherra hafi á fundi með starfsfólki fyrir helgi einna helst gefið upp ástæðuna fyrir flutningunum hátt verð húsnæðis á höfuðborgarsvæðinu.

30. júní 2014

Jónsmessuferðin - myndir

Yfir 100 manns nutu leyndardóma Snæfellsness í Jónsmessuferð LSFR sem var farin þriðjudaginn 24. júní. Lagt var af stað kl. 8:00 frá Grettisgötu 89 sem leið lá á Snæfellsnesið. Komið var m.a. við á Bjarnarhöfn, Grundarfirði þar sem boðið var upp á kjötsúpu, Ólafsvík og Arnarstapa. Að ferð lokinni var snæddur gómsætur kvöldverður í Kaffi Munaðarnesi hjá þeim Berki og Helenu. Hér má sjá myndir úr ferðinni.

28. júní 2014

Flutningur Fiskistofu

Nú rétt fyrir helgi bárust starfsmönnum Fiskistofu þær fréttir að flytja ætti stofnunina norður á Akureyri. Þetta kom öllum á óvart enda hvergi verið rætt né kynnt áður. Um 70 manns starfa hjá Fiskistofu og er stefnt að því flutningurinn verði að fullu afstaðinn í lok árs 2015, en þetta er stærsti flutningur ríkisstofnunar á milli landshluta hingað til.

23. júní 2014

Hægt miðað í samningum við Samband íslenskra sveitarfélaga

Hægt hefur miðað í viðræðum við Samband íslenskra sveitarfélaga en kjarasamningurinn rann út 30. apríl síðast liðinn. Líkt og í fyrri samningum hefur SFR stéttarfélag farið í sameiginlegar kjaraviðræður með BSRB félögunum sem starfa hjá sveitarfélögum. Það er alveg ljóst að við getum ekki við það unað að Sambandið gangi frá hverjum kjarasamningnum á fætur öðrum með verulegum kjarabótum en ætli síðan að bjóða félagsmönnum aðildarfélaga BSRB allt annað. Krafa stéttarfélaganna er skýr, sambærilegar launahækkanir og aðrir viðsemjendur Sambands íslenskra sveitarfélaga hafa fengið, svo sem grunnskólakennarar, BHM og nú síðast leikskólakennarar.