Fréttir og greinar

Launakönnun SFR og könnunin um Stofnun ársins er nú á lokametrunum. Fólk er beðið um að svara fyrir 30. mars næstkomandi.  Það verður ekki nægilega ítrekað hversu mikið góð þátttaka skiptir í svona könnun. Niðurstöður hennar gefa okkur skýra mynd af því sem er að gerast í launaþróun milli samninga og um aðbúnað og líðan félagsmanna. Þessar upplýsingar eru afar mikilvægar í baráttu okkar fyrir betri kjörum. Gefðu þér nokkrar mínútur og svaraðu könnuninni. Ef fólk kannast ekki við að hafa fengið hana senda má hafa samband við tomas.bjarnason@gallup.is eða gudrun@sfr.is.

Orlofsblað SFR fer í póst til félagsmanna í dag. Í blaðinu eru kynntir allir orlofsmöguleikar sem félagsmönnum standa til boða. Þar eru ítarlegar lýsingar og myndir af orlofshúsum, leiðbeiningar um úthlutun og bókanir og margt fleira gagnlegt og skemmtilegt. Orlofssjóður á 32 eignir sem leigðar eru út til félagsmanna og leigir auk þess um 10 hús til viðbótar víða um land til afnota fyrir félagsmenn auk íbúðar í Kaupmannahöfn.

Stjórn BSRB hefur nú til skoðunar hvort bandalagið mun koma að stofnun íbúðafélags ásamt Alþýðusambandi Íslands (ASÍ). Félagið mun verða leigufélag sem rekið verður án hagnaðarsjónarmiða. Skýrast mun á næstu vikum hvort, og þá hvernig, BSRB mun taka þátt í stofnun íbúðafélagsins, segir á heimasíðu BSRB.

Allir eiga rétt á því að starfsumhverfi þeirra einkennist af gagnkvæmri virðingu í samskiptum. Í því felst að starfsmenn eiga rétt á því að njóta skilyrðislausrar verndar gegn kynbundinni og kynferðislegri áreitni og öðru ofbeldi á vinnustað. Nú er kominn út bæklingur þar sem farið er yfir ýmis atriði tengt kynbundinni og kynferðislegri áreitni og ofbeldi á vinnustöðum. Að bæklingnum standa ASÍ, BHM, BSRB, KÍ, Jafnréttisráð og Jafnréttisstofa. Hann kom út 8. mars, á alþjóðlegum baráttudegi kvenna og kynnti Sonja Þorbergsdóttir lögfræðingur BSRB hann m.a. á hádegisverðarfund bandalaganna á Grand Hótel Reykjavík.

Verið er að vinna að nýjum Mínum síðum SFR og uppsetningu á styrkjaumsóknum og eru félagsmenn beðnir um að sýna þolinmæði ef upp koma villuskilaboð í umsóknarferlinu. Gott að senda tölvupóst á johanna@sfr.is með mynd af villuskilaboðunum.

Flestir hafa nóg að gera í því að stunda vinnu, sjá um fjölskyldu og sinna áhugamálum. Það er þó mikilvægt að gefa sér tíma til að huga að símenntun og bæta við þekkingu en þannig styrkjum við stöðu okkar á vinnumarkaði. Félagsmenn eru hvattir til að kynna sér hvað er á döfinni hjá Starfsmennt á næstu vikum en nánari upplýsingar er að finna á vefnum okkar, www.smennt.is. Nám og þjónusta Starfsmenntar er án endurgjalds fyrir félagsmenn SFR.