Fréttir og greinar

21. september 2015

Atkvæðagreiðsla um verkfall

Atkvæðaseðill vegna fyrirhugaðra verkfallsaðgerða verður sendur til félagsmanna SFR sem starfa hjá ríkinu, á morgun, þriðjudaginn 22. september. Félagsmenn fá upplýsingar um framkvæmd rafrænnar atkvæðagreiðslu senda á lögheimili sitt. Félagsmenn sem eru með rétt netfang skráð hjá SFR fá gögnin einnig send í tölvupósti. Rafræna kosningin hefst þriðjudaginn 22. september og stendur til hádegis þriðjudaginn 29. september.

18. september 2015

Staðan í kjaramálum, kosning um verkfall/verkfallsaðgerðir og skipulag aðgerða

SFR stéttarfélag í almannaþjónustu, Sjúkraliðafélag Íslands,  og Landssamband lögreglumanna hafa sameiginlega átt í kjaraviðræðum við ríkið frá því í mars á þessu ári. Ekkert hefur þokast í samningsátt og enn ber gríðarlega mikið á milli samningsaðila. Að öllu óbreyttu stefnir í boðun verkfalls. Félagsmenn fá upplýsingar um framkvæmd rafrænnar atkvæðagreiðslu senda á lögheimili sitt. Rafræna kosningin hefst þriðjudaginn 22. september.

16. september 2015

Trúnaðarmannaráð samþykkti allsherjaratkvæðagreiðslu um verkfall

Trúnaðarmannaráð SFR kom saman í dag til að taka ákvörðun um allsherjaratkvæðagreiðslu um verkfall. Fundurinn var mjög fjölmennur og miklar umræður urðu um stöðuna sem upp er komin í kjaraviðræðum við ríkið og framkvæmd verkfalls ef til kemur. Lagt var til að fram fari allsherjaratkvæðagreiðsla um boðun verkfalls og að henni skuli vera lokið 27. september 2015 og var tillagan samþykkt einróma. Nú þegar verður hafist handa við undirbúning atkvæðagreiðslunnar.

15. september 2015

Fullt út úr dyrum í Háskólabíói

Baráttufundur félagsmanna SFR, SLFI og LL í Háskólabíói var mjög kröftugur svo ekki sé meira sagt. Sterk skilaboð komu fram í ályktun fundarins sem samþykkt var með dynjandi lófataki.

14. september 2015

Baráttufundur í Háskólabíó 15. sep. kl. 17

Á morgun, þri. 15. sep. kl. 17, standa SFR, SLFÍ og LL fyrir baráttufundi fyrir bættum kjörum. Þá fjölmennum við, félagsmenn SFR, í Háskólabíó. Nú verður blásið í lúðra!

Stjórnvöld hafa hafnað því að félagsmenn SFR, SLFÍ og LL fái sambærilegar kjarabætur og sérfræðingar og hálaunafólk, sem starfar hjá ríkinu. Þeir sem eru á lægri launum eiga að sætta sig við einungis hluta í stað sambærilegra kjarabóta.  VIÐ SEGJUM NEI!

Við treystum við því að þið mætið á fundinn. Það er algjört lykilatriði til þess að stjórnvöld skynji alvöruna í kröfum okkar og baráttuvilja félaganna. Við ætlum ekki að sætta okkur við lakari kjör en aðrir ríkisstarfsmenn!

Sýnileiki okkar og samstaða er vopnið okkar í kjarabaráttu – sýnum styrk – mætum

10. september 2015

Hiti í trúnaðarmönnum vegna stöðunnar í kjarasamningsviðræðum

Afar fjölmennum fundi trúnaðarmannaráðs SFR lauk rétt í þessu, en þar voru kjaramálin og staða mála í samningaviðræðum helsta umfjöllunarefnið. Mikil óánægja og reiði var í félagsmönnum með síðustu viðbrögð samninganefndar ríkisins og var hljóðið í þeim á þann veg að eina lausnin framundan væru aðgerðir. Flestir sögðu það vera andann á sínum vinnustað, fólk væri búið að fá nóg og vildi sanngirni. Þau væru í störfum við hlið þeirra ríkisstarfsmanna sem nýlega hafa fengið mun meiri launahækkanir en SFR félögum væri boðið. Þetta væri með öllu óásættanlegt.

Næstkomandi þriðjudag 15. september kl. 17:00 verður boðið til stórfundar í Háskólabíói og munu trúnaðarmenn sem og félagsmenn allir fjölmenna þar, enda mikill hiti í fólki.

09. september 2015

Samningafundi lauk án árangus

SFR stéttarfélag í almannaþjónustu, Sjúkraliðafélag Íslands og Landssamband lögreglumanna hafa verið í sameiginlegum viðræðum við Samninganefnd ríkisins um nokkurt skeið. Þegar hafa verið haldnir 6 fundir undir stjórn ríkissáttasemjara og lauk 7. fundi í dag án árangurs. Ekki hefur verið boðaður annar fundur í kjaradeilu félaganna við ríkið.

09. september 2015

Mun rómuð staða ríkissjóðs skila sér inn í kjarasamningsviðræður félaganna í dag?

Ef marka má ræður forsætis- og fjármálaráðherra í gærkvöld hljóta samninganefndir SFR, SLFÍ og LL að fara bjartsýnar á fund samninganefndar ríkisins síðar í dag. Í stefnuræðu sinni rómuðu þeir góðan árangur ríkisins í efnahagsmálum og boðuðu skattalækkanir og betri afkomu heimilanna.

04. september 2015

BSRB ályktar um stöðuna í kjaramálum

Stjórn BSRB kom saman til fundar í dag og samþykkti þar ályktun vegna stöðunnar í viðræðum aðildarfélaga bandalagsins við samninganefnd ríkisins.Í ályktuninni segir m.a. að með nýjasta samningstilboði sínu sé ríkið að mismuna starfsfólki sínu eftir því hvaða stéttarfélagi það tilheyrir og að ríkið verði að ganga til samninga með hliðsjón af því sem gerðardómur taldi sanngjarnar kjarabætur fyrir aðra starfsmenn ríkisins.