Fréttir og greinar

30. apríl 2014

Samningar við Matís samþykktir

Félagsmenn SFR hjá Matis ohf hafa greitt atkvæði um breytingar og framlengingu á kjarasamningi SFR og Matís. Á kjörskrá voru 9. 8 greiddu atkvæði eða 89% Já sögðu 7 eða 88%.  Einn sagði nei eða 12% og engir seðlar voru auðir eða ógildir.

29. apríl 2014

Samningaviðræður sigldu í strand

Samninganefndir SFR, FFR og LSS og Samtaka atvinnulífsins, fyrir hönd Isavia, hafa setið á samningafundi frá því í gær og lauk fundi ekki fyrr en á sjöunda tímanum í morgun án þess að árangur næðist. Ekki hefur verið boðað til nýs fundar en allsherjarverkfall hefst á öllum flugvöllum landsins aðfararnótt miðvikudags, náist ekki samningar í tíma.

28. apríl 2014

Skrifað undir kjarasamning við RARIK

Samningur SA vegna RARIK ohf. og SFR var undirritaður í dag, 28. apríl. Kynningarfundur um samninginn verður 6. maí hjá RARIK. Rafræn atkvæðagreiðsla er í undirbúningi og verður væntanlega opin 6. og 7. maí. Samningurinn gildir frá 1. febrúar 2014 til 28. febrúar 2015.  

Hinn 1. febrúar 2014 skulu laun og launataxtar hækka um 2,8%, þó að lágmarki kr. 8.000 á mánuði fyrir dagvinnu miðað við fullt starf. Aðrir kjaratengdir liðir hækka um 2,8% á sama tíma. Launataxtar undir kr. 230.000 hækka aukalega um kr. 1.750. Í stað launabreytinga frá 1. janúar 2014 greiðist sérstök eingreiðsla, kr. 14.600 ...

25. apríl 2014

Framkvæmdastjóri SA tjáir sig um launamál vinnandi fólks

Afar sérstakt viðtal birtist við Þorstein Víglundsson framkvæmdastjóra Samtaka atvinnulífsins (SA) í morgun. Þar tjáir hann sig um kjarabaráttu félagsmanna FFR, SFR og LSS við ríkisfyrirtækið Isavia. Sá tónn sem kemur fram í viðtalinu við  framkvæmdastjórann skýrir vel hvernig stendur á því að samningaviðræður hafa gengið illa frá upphafi. Samningamenn Isavia og SA hafa ekki haft umboð nema til að hafna réttmætum kröfum launafólks. Línan frá SA er ljós; ómenntaður lýðurinn á ekki að hafa betri kjör en þetta. Það er nægjanlegt að þetta fólk rétt slefi yfir lámarksgrunnlaun eftir áralangt starf. 

25. apríl 2014

Atkvæðagreiðsla um verkfallsaðgerðir

Í gær sumardaginn fyrsta lauk atkvæðagreiðslu um verkfallsboðun starfsmanna fyrirtækja í Samtökum fyrirtækja í velferðarþjónustu. Kosningaþátttaka var 61,9% og samþykkti mikill meirihluti félagsmanna verkfallsboðunina, eða 65%. Samþykkið tekur til félagsmanna er starfa hjá eftirtöldum stofnunum SFV vegna: Áss, Eirar, Grundar, HNLFÍ, Hrafnistu Hafnarfirði, Hrafnistu Kópavogi, Hrafnistu Reykjavík, Krabbameinsfélagsins, Markar, SÁÁ, Sjálfsbjargarheimilisins, Skjóls, Skógarbæjar, Sunnuhlíðar og öðrum stofnunum innan SFV þar sem félagsmenn SFR starfa.

23. apríl 2014

Vinnustöðvun á flugvöllum landsins

Þúsundir farþega í Flugstöð Leifs Eiríkssonar sýna kjarabaráttu starfsmanna ríkan skilning.

Annað skammtímaverkfall félagsmanna SFR, FFR og LSS gagnvart Isavia stóð yfir frá kl. 4 til 9 í morgun. Verkfallsverðir félaganna stóðu vaktina og gættu þess að ekki væri gengið í störf félagsmanna. Allt gekk það snurðulaust fyrir sig og ekki kom til ágreinings um framkvæmd vinnustöðvunarinnar. Flugfarþegar sýndu góðan skilning á kjarabaráttu starfsmanna og biðu þolinmóðir eftir því að félagsmenn hæfu störf kl. 9.

22. apríl 2014

Atkvæðagreiðsla um verkfallsaðgerðir

Í dag hófst rafræn atkvæðagreiðsla um verkfallsaðgerðir starfsmanna hjá fyrirtækjum í Samtökum fyrirtækja í velferðarþjónustu. Eins og áður hefur komið fram hafa SFR og Sjúkraliðafélagið haft samstarf í kjarasamningsviðræðum við SFV, en samningaviðræður hafa ekki gengið sem skyldi. Á fjölmennum fundi fyrir páska var ákveðið að efna til atkvæðagreiðslu um verkfallsboðun. Atkvæðagreiðslan hófst í dag en henni lýkur á hádegi næstkomandi fimmtudaginn, þ.e. sumardaginn fyrsta. Félagsmenn eru hvattir til að nýta sér rétt sinn og taka þátt í kosningu um verkfallsaðgerðir.

17. apríl 2014

Gleðilega páska

Gleðilega páska gott fólk - skrifstofa félagsins opnar aftur þriðjudaginn 22. apríl.

16. apríl 2014

Kjarasamningur SFR við ríkið samþykktur

Niðurstöður úr atkvæðagreiðslu um kjarasamning SFR og ríkisins sem lauk nú um hádegi liggja nú fyrir, en samningurinn hefur verðið samþykktur með 61,92% atkvæða. Á kjörskrá voru 3933, þar af kusu 1581. Já sögðu 61.92%, eða 979 og 35,08% sögðu nei eða 566. Auð atkvæði voru 36 eða 2,28%. Kjörsókn var 40,20%.

 

 

16. apríl 2014

Baráttufundur um verkfallsaðgerðir

Afar fjölmennur baráttufundur félagsmanna SFR stéttarfélags og Sjúkraliðafélags Íslands sem starfa hjá Samtökum fyrirtækja í velferðarþjónustu (SFV) var haldinn síðdegis í gær. Á fundinum voru kjör og réttindi félagsmanna til umræðu og staðan í kjaraviðræðum félaganna við SFV. Húsfyllir var á Grettisgötunni þar sem fundurinn var haldinn og stóð fólk meðfram göngum út á götu. Mikill hiti var í fundarfólki enda flestir orðnir afar langeygðir eftir kjarabótum fyrir þennan hóp sem telur um fimm hundruð manns. Á fundinum var tekin einróma sameiginleg ákvörðun um að félögin efni til atkvæðagreiðslu um verkfallsboðun. Enda hafa viðsemjendur ekki sýnt neinn vilja til þess að koma til móts við kröfur félaganna og mikil óánægja er með gang mála.