Fréttir og greinar

07. ágúst 2014

Hverju ætlar þú að bæta við þig í vetur - skráning í nám hjá Fræðslusetrinu Starfsmennt hafin

Í nýju veffréttabréfi Fræðslusetursins Starfsmenntar má sjá hluta af þeim námskeiðum sem í boði verða í vetur hjá setrinu en allar nánari upplýsingar eru inni á www.smennt.is. Starfsmennt hefur tekið upp þá nýbreytni að birta dagsetningar margra námskeiða bæði á vor-og haustönn til að auðvelda fólki að tengja saman nám og starf. Að venju er nám Starfsmenntar félagsmönnum SFR að kostnaðarlausu sem hluti starfsþróunar. Þarna er m.a. námskeið um verkefnastjórnun, nám fyrir starfsfólk í stjórnunareiningum, fjarkennd tölvunámskeið, tungumálanám og námskeið fyrir stuðningsfulltrúa.

24. júlí 2014

Kjarasamningur við Samband íslenskra sveitarfélaga samþykktur

Félagsmenn SFR er starfa hjá sveitarfélögunum hafa samþykkt nýjan kjarasamning félagsins við Samband íslenskra sveitarfélaga er undirritaður var 3. júlí sl.

Kjarasamningurinn var samþykktur með 75% greiddra atkvæða. Á kjörskrá voru 230 en af þeim kusu 57. Kjörsókn var 25%

23. júlí 2014

Mótmælum árásum á almenna borgara

Í dag, miðvikudag 23. júlí kl. 17, stendur Félagið Ísland - Palestína fyrir útifundi á Ingólfstorgi. Fundurinn verður haldinn undir kjörorðinu "stöðvum blóðbaðið á Gaza, alþjóðlega vernd fyrir Palestínumenn, burt með herkvína um Gaza, niður með hernámið".

SFR stéttarfélag hvetur félagsmenn sína til að mæta á fundinn. Yfir 600 Palestínumenn hafa týnt lífi í árásum Ísraela á byggðir Palestínumanna á Gaza sem nú hafa staðið í 15 sólarhringa. Flestir hinna látnu eru almennir borgarar.

21. júlí 2014

Betur heima setið en af stað farið?

Alma Lísa Jóhannsdóttir skrifar

Þegar til stendur að breyta skipulagi innan stjórnsýslunnar er afar mikilvægt að undirbúa ferlið vel. Reynslan hefur kennt okkur margt og rannsóknir hafa sýnt fram á að ávinningur af slíkum ákvörðunum getur orðið lítill sem enginn ef ekki er staðið vel að málum frá upphafi.

Almennt telst góður undirbúningur og samþætting ólíkra verkefna vera lykilatriði í skipulagsbreytingum. Einnig verður að huga vel að starfsfólki í öllu ferlinu. Ákvörðunin þarf að vera vel ígrunduð og tryggja þarf að hún sé skynsamleg.

09. júlí 2014

Laust í Súðavík

Vegna sérstakra aðstæðna losnaði hús SFR í Súðavík vikuna 25. júlí til 1. ágúst. Áhugasamir geta farið inn á orlofsvef félagsins og bókað húsið.

08. júlí 2014

Blað stéttarfélaganna í prentun

Sumarblað Blaðs stéttarfélaganna sem gefið er út af SFR stéttarfélagi og Starfsmannafélagi Reykjavíkurborgar er nú í prentun og verður dreift til félagsmanna síðar í vikunni. Í blaðinu nú má m.a. lesa um niðurstöður í könnuninni um Stofnun ársins, en farið var í heimsókn til tveggja stofnana sem hlutu titilinn og talað við bæði starfsmenn og forstjóra. Þessar stofnanir eru Orkuveita Reykjavíkur sem var stofnun ársins í flokki stærri stofnana hjá St.Rv. og Sjálfsbjargarheimilið sem var Stofnun ársins hjá SFR í flokki stærstu stofnana.

Í sumarblaðinu hefur einnig nýr greinarflokkur um umhverfismál göngu sína, en í þessari fyrst grein er fjallar Auður Alfífa um plastpokanotkun. Þá fjallar Vésteinn Valgarðsson um verkalýðsmál í Danaveldi og vinningsmyndirnar úr ljósmyndasamkeppni blaðsins eru einnig birtar í blaðinu.

08. júlí 2014

Framvegis heldur áfram þrátt fyrir brunann

SFR á hlut í Framvegis miðstöð um símenntun, ásamt Sjúkraliðafélagi Íslands, Starfsmannafélagi Reykjavíkurborgar og Promennt. Í ljósi atburða síðastliðið sunnudagskvöld vill stjórn og starfsfólk Framvegis koma eftirfarandi skilaboðum á framfæri: Við færum slökkviliði og björgunarfólki einlægar þakkir fyrir frábært og óeigingjarnt starf vegna brunans í Skeifunni. Talsvert tjón varð á húsnæði Framvegis en þó mun minna en útlit var fyrir í fyrstu. Við sjáum því fram á að starfsemi Framvegis hefjist samkvæmt áætlun í haust enda eru mörg spennandi námskeið og verkefni framundan. Skráning á námskeið fer sem áður fram í gegnum vefinn okkar www.framvegis.is.

04. júlí 2014

Samningar í höfn

Gengið hefur verið frá kjarasamningum við Ás styrktarfélag og Samband íslenskra sveitarfélaga. Samningar verða kynntir í næstu viku og rafræn atkvæðagreiðsla verður í kjölfarið.

02. júlí 2014

Hólmavík - vikan 4. til 11. júlí var að losna

Næsta vika á Hólmavík var að losna óvænt af óviðráðanlegum orsökum. Um er að ræða 4. - 11. júlí í einbýlishúsi á einni hæð byggt 1983 samtals 105 fm. Eignin skiptist í fordyri, forstofu með skápum, hol, tvö rúmgóð svefnherbergi, stóra stofu, eldhús með borðkrók, þvottahús inn af eldhúsi og baðherbergi. Úr stofu er gengið út á gróna lóð. Vikan kostar kr. 25.000.

01. júlí 2014

Hópuppsagnir eða hreppaflutningar?

Rétt í þessu lauk fjölmennum fundi starfsmanna Fiskistofu þar sem fyrirhugaður flutningur stofnunarinnar var ræddur. Á fundinn voru mættir fulltrúar þeirra stéttarfélaga sem starfsmenn stofnunarinnar tilheyra. Þungt hljóð var í fólki en meðal umræðuefna voru réttindi fólks til biðlauna, eftirlauna og uppsagnarfrests. Þá voru ástæður ákvörðunarinnar ofarlega í hugum fólks og þær aðferðir sem viðhafðar hafa verið við ákvarðanatökuna. Svo virðist sem ráðherra hafi á fundi með starfsfólki fyrir helgi einna helst gefið upp ástæðuna fyrir flutningunum hátt verð húsnæðis á höfuðborgarsvæðinu.