Fréttir og greinar

26. september 2014

Félagsráð fundar

Á fundi Félagsráðs SFR sem haldinn var í gær hélt Indriði H. Þorláksson, fyrrv. ríkisskattstjóri erindi sem hann kallaði Ríkisfjármál og skattapólitík. Erindi hans var afar áhugavert enda byggt á áratuga reynslu og mikilli þekkingu. Indriði talaði bæði um fortíð og framtíð í erindi sínu og sagðist m.a. leggja lítið upp matarskattsumræðunni í dag. Stóru málin fyrir ríkisfjármálin væri það að tekjur fyrir auðlindirnar skiluðu sér til þjóðarinnar.

22. september 2014

Námsvísir Starfsmenntar veturinn 2014-2015 kominn út

Fræðslusetrið Starfsmennt hefur gefið út nýjan og glæsilegan námsvísi fyrir veturinn 2014 - 2015 sem verður borinn út til allra félagsmanna SFR innan skamms, en þjónusta Starfsmenntar er félagsmönnum að kostnaðarlausu. Bæklingurinn er hér á rafrænu formi og hvetjum við alla til að kynna sér fjölbreytt úrval námskeiða sem verður í boði í vetur. Vakin er athygli á þeirri nýjung að fjöldi námskeiða verður í boði í fjarkennslu með sendingum beint í tölvur einstaka þátttakenda.

17. september 2014

Enginn blekkingarleikur í gangi

Árni Stefán Jónsson formaður SFR stéttarfélags í almannaþjónustu segir ummæli Vigdísar Hauksdóttur formanns fjárlaganefndar byggð á misskilningi og vanþekkingu.

Á Alþingi í gær sagði Vigdís Hauksdóttir, formaður fjárlaganefndar, að hjá hinu opinbera væri stundaður blekkingarleikur með laun og reynt væri að villa um fyrir ráðuneytum þar sem stór hluti launa opinberra starfsmanna væri óunnin yfirtíð. Þarna vitnaði Vigdís til frétta af niðurstöðum könnunar SFR sem kynntar voru í vikunni. Þar kom m.a. fram að stór hluti starfsmanna fær einhvers konar aukagreiðslur, m.a. í formi óunnar yfirvinnu, karlar þó meira en konur. Vigdís sagði að með þessu væri verið að villa um fyrir ráðuneytum og spurði m.a. hvernig í ósköpunum væri hægt að reka ríkið þegar svona blekkingarleikur væri í gangi.

17. september 2014

Fjölmennum í Loftslagsgönguna 21. sep.

Þann 21. september mun almenningur fylkja liði um allan heim til að krefjast þess að gripið verði til raunverulegra aðgerða til að hefta útblástur gróðurhúsalofttegunda. Ban Ki-moon, aðalritari Sameinuðu þjóðanna, hefur boðið leiðtogum þjóðríkja heims til fundar í New York þann 23. sept. til þess að liðka fyrir að samkomulagi um aðgerðir gegn loftslagsbreytingum verði náð á næstu loftslagsráðstefnu SÞ í París í lok árs 2015. Í Reykjavík verður safnast saman við hið svokallaða „Drekasvæði“ kl. 14.00, sem staðsett er á horni Njálsgötu, Frakkastígs og Kárastígs.

15. september 2014

Launakönnun SFR 2014 niðurstöður

Launakönnun SFR kemur nú út áttunda árið í röð. Könnunin er gerð í samstarfi við VR og St.Rv. og er unnin af Capacent Gallup. Launakönnunin er ein stærsta og veigamesta launa- og vinnumarkaðskönnun landsins.

Niðurstöður launakönnunar SFR 2014 sýna m.a. að heildarlaun félagsmanna hækkuðu um 7% frá síðustu könnun. Það þýðir að meðal-heildarlaun SFR félagsmanna hafa á tímabilinu hækkað umfram kjarasamningsbundnar launahækkanir sem almennt voru rúmlega 3%, umfram vísitölu neysluverðs sem var 3,1% á tímabilinu og einnig umfram launavísitölu ríkisstarfsmanna sem var 5,6% á þessu tímabili. Þetta er vissulega jákvæð þróun.

Launaþróunin á tímabilinu frá janúar 2013 til janúar 2014 hefur því verið jákvæð. Það er hins vegar áhyggjuefni að nú eykst kynbundinn launamunur á milli kannana. Hann nældist 7% í fyrr en mælist 10% nú. Þetta sýnir að hvergi má slaka í baráttunni fyrir launajafnrétti. Nánari niðurstöður má lesa hér.

12. september 2014

Ályktun frá stjórn BSRB vegna fjárlagafrumvarps

Stjórn BSRB hefur sent frá eftirfarandi ályktun vegna fjárlaga 2015.

Stjórn BSRB mótmælir þeim fyrirætlunum að hækka skatta á nauðsynjavörur, draga úr áunnum rétti atvinnulausra og aukningu á greiðsluþátttöku almennings fyrir almannaþjónustu líkt hún birtist okkur í frumvarpi til fjárlaga fyrir árið 2015.

12. september 2014

Blað stéttarfélaganna í prentun

31597-sept-2014-proof-NET-1 Blað stéttarfélaganna er nú í prentun og verður dreift til félagsmanna SFR og St.Rv. fljótlega eftir helgina. Í blaðinu eru m.a. kynntar niðurstöður launakannanna félaganna, en einnig verður opnað fyrir niðurstöðurnar á heimasíðum félaganna á mánudagsmorgninum 15. september. Auk þess er í blaðinu ítarleg lýsing á þeim Gott að vita námskeiðum sem standa félagsmönnum til boða á haustmisseri. Athugið þó að skráning fyrir námskeiðin hefst 17. september næstkomandi kl. 9, en upplýsingar má einnig fá á netinu.

12. september 2014

Samningur SFR og Ás styrktarfélags samþykktur

Atkvæðagreiðslu um samning SFR og Ás styrktarfélags er lokið. Á kjörskrá voru 160, en 28 atkvæði bárust, þannig að kjörsókn var 17,5%. Já sögðu 18 eða 64%. Nei sögðu 10 eða 36%. Samningurinn er því samþykktur.

10. september 2014

Harðari áherslur í fjárlagafrumvarpi ríkisstjórnarinnar

Fjárlagafrumvarp ríkisstjórnarinnar var kynnt í gær en þar koma fram helstu áherslur stjórnarinnar fyrir næsta ár. Árni Stefán Jónsson formaður SFR stéttarfélags í almannaþjónustu, er meðal þeirra sem eru ekki hrifnir af því sem þar birtist.

„Hér er augljóslega á ferðinni frumvarp sem boðar nýjar og harðari áherslur. Litla manninum og þeim sem minna mega sín er hér hreinlega ýtt til hliðar m.a. með niðurskurði til Vinnumálastofnunar og ekki síst með hækkunum á virðisaukaskatti á mat- og nauðsynjavöru,“ segir Árni Stefán Jónsson formaður SFR stéttarfélag í almannaþjónustu um fjárlagafrumvarp ríkisstjórnarinnar sem kynnt var í gær.

10. september 2014

Fjárlagafrumvarpið – stefna stjórnvalda um skipulagsbreytingar og umbætur í ríkisrekstri

Alma Lísa Jóhannsdóttir, ráðgjafi hjá SFR skrifar:

Fjármálaráðherra Bjarni Benediktsson sagði í fréttum Ríkisútvarpsins í morgun að Ísland væri ekki að færast frá Norðurlöndunum þrátt fyrir að hlutur samneyslunnar af vergri þjóðarframleiðslu fari undir þau mörk sem þekkist á hinum Norðurlöndunum. Þá kom einnig fram að fjármálaráðherra telur þjónustustig og gæði þjónustunnar á Íslandi vera eins og best getur.

Engu að síður boðar fjárlagafrumvarpið stórfelldar breytingar. Verkefni stjórnvalda breytast svo sannarlega. Leiðin sem hér er valin til þess að leysa þær áskoranir sem bíða okkar er kerfisbreyting. Fjármálaráðherra vill láta einkamarkaðinn sjá um velferðar- og heilbrigðisþjónustuna.