Fréttir og greinar

27. nóvember 2018

Ljúft aðventukvöld

Aðventukvöld SFR og St.Rv. var haldið á fimmtudagskvöldið í síðustu viku og var það ágætlega sótt. Þar spilaði og söng Svavar Knútur fjölmörg lög og rithöfundarnir Þóra Kristín Ásgeirsdóttir, Þórdís Gísladóttir og Lilja Sigurðardóttur lásu upp úr nýjum bókum sínum sem reyndust hver annarri forvitnilegri. Þetta var notalegt kvöld og fyrir okkur mörg markar aðventukvöld félaganna nokkurs konar upphaf að jólaaðventunni. Við þökkum listamönnunum kærlega fyrir skemmtunina og ekki síður félagsmönnum sem deilu með okkur notalegri kvöldstund.

21. nóvember 2018

Aðventukvöld SFR og St.Rv.

SFR og St.Rv. halda sitt árlega aðventukvöld 22. nóvember að Grettisgötu 89. Við hefjum leikinn kl. 20:00 með upplestri úr nokkrum nýjum bókum úr jólabókaflóðinu. Það eru rithöfundarnir Þóra Kristín Ásgeirsdóttir, Þórdís Gísladóttir og Lilja Sigurðardóttir sem munu koma og lesa upp en auk þess mun tónlistarmaðurinn geðþekki Svavar Knútur spila nokkur lög fyrir gesti. Boðið verður upp á jólalegar veitingar við kertaljós og notalega stemningu.

16. nóvember 2018

Desemberuppbót

Starfsmaður sem er í starfi fyrstu viku nóvembermánaðar fær greidda desemberuppbót miðað við fullt starf tímabilið frá 1. janúar til 31. október. Desemberuppbót er föst krónutala og tekur ekki hækkunum samkvæmt öðrum ákvæðum kjarasamningsins og skal hún greidd út eigi síðar en 15. desember 2018.

15. nóvember 2018

Trúnaðarmenn funda

Trúnaðarmannaráðsfundur SFR stendur nú yfir en þar er meðal annars rætt um niðurstöður atkvæðagreiðslunnar um sameiningu félaganna og næstu skref. Árni Stefán Jónsson sagði frá því að verið væri að vinna að því að búa til lagaramma utan um sameinað félag. Það væru mörg handtökin og þó við vildum helst sjá þetta gerast fyrir kjarasamningana í lok mars þá þyrfti ferlið að taka sinn tíma. Vonast er til þess að hægt verði að halda stofnfund nýs félags í janúar á næsta ári. Fljótlega verður farið af stað með samkeppni um nafn á félagið og mun samkeppnin verða auglýst sérstaklega og óskað eftir þátttöku félagsmanna. Þá var greint frá því að til stendur að halda sameiginlega kjararáðstefnu þann 28. nóvember næstkomandi og munu trúnaðarmenn verða boðaðir þangað.

09. nóvember 2018

Atkvæðagreiðslu lýkur kl. 12 í dag

Nú fer hver að verða síðastur til að kjósa. Atkvæðagreiðslunni um sameiningu félaganna lýkur kl. 12 á hádegi í dag. Nú þegar hafa um 37% félagsmanna kosið svo við hvetjum alla þá sem enn eiga eftir að kjósa að fara inn á vefsíðu SFR www.sfr.is og gera það, fyrir kl. 12 í dag. Kjörstjórnir félaganna munu síðan hittast og fara yfir niðurstöður atkvæðagreiðslunnar sem verður kynnt á milli klukkan kl. 13 og 14 í dag.

07. nóvember 2018

Góð þátttaka í allsherjar atkvæðagreiðslu

Nú á öðrum degi allsherjar atkvæðagreiðslu um sameiningu SFR og St.Rv. hafa um 20% félagsmanna SFR þegar kosið og margir haft samband við skrifstofu félagsins til þess að fá upplýsingar og leiðbeiningar. Við hvetjum alla félagsmenn til þess að taka þátt og kjósa. Það skiptir afar miklu máli að þátttakan verði góð og að afgerandi niðurstaða fáist. Þannig fær forysta félaganna skýra leiðsögn um næstu skref.

26. október 2018

Opinn félagsfundur 1. nóvember

Undanfarnar vikur höfum við heimsótt fjölmarga vinnustaðai víða um land og kynnt fyrir félagsfólki hugmyndir um sameiningu SFR og St.Rv. Þann fyrsta 1. nóvember verður einnig haldinn opinn félagsfundur á Grettisgötu 89 kl. 16:30 um málið. Markmiðið er að ná til sem flestra og fá fólkið okkar til að kynna sér málin, ræða saman og spyrja spurninga og því hvetjum við félagsfólk til að fjölmenna.

19. október 2018

Sonja Ýr nýr formaður BSRB

Rétt í þessu var tilkynnt um nýjan formann BSRB en tveir frambjóðendur gáfu kost á sér í embætti formanns BSRB. Þetta voru þau Sonja Ýr Þorbergsdóttir núverandi lögfræðingur bandalagsins og Vésteinn Valgarðsson trúnaðarmaður hjá SFR og aðaltrúnaðarmaður á Landspítalanum. Sonja Ýr var kjörin formaður með miklum meirihluta atkvæða.

17. október 2018

Starfsfólk á BSRB þingi

Við ætlum að vera virk á BSRB þinginu og því verður mögulega örlítið hægar svarað í símann milli kl. 10:00 og 12:00 í dag þar sem flestir verða á þingsetningunni. Við biðjum ykkur um að sýna því þolinmæli og hringja kannski aftur síðar eða senda okkur póst á sfr (at) sfr.is

16. október 2018

Hjálpaðu okkur að ná til þín

Þessa dagana er SFR með sérstakt átak í gangi til þess að betrumbæta félagaskrána, þ.e. bæta inn símanúmerum og netföngum þar sem vantar. Þess vegna gætu einhverjir félagsmenn átt von á símtali frá okkar fólki þar sem spurt er um netfang. Okkur langar að biðja ykkur um hjálpa okkur í þessu átaki og fara inn á Mínar síður og bæta þar inn upplýsingum ef vantar, eða hafa samband við skrifstofuna ef þið hafið t.d. nýlega fengið nýtt netfang eða síma (s. 525 8330 eða sfr@sfr.is).