Fréttir og greinar

23. júní 2014

Hægt miðað í samningum við Samband íslenskra sveitarfélaga

Hægt hefur miðað í viðræðum við Samband íslenskra sveitarfélaga en kjarasamningurinn rann út 30. apríl síðast liðinn. Líkt og í fyrri samningum hefur SFR stéttarfélag farið í sameiginlegar kjaraviðræður með BSRB félögunum sem starfa hjá sveitarfélögum. Það er alveg ljóst að við getum ekki við það unað að Sambandið gangi frá hverjum kjarasamningnum á fætur öðrum með verulegum kjarabótum en ætli síðan að bjóða félagsmönnum aðildarfélaga BSRB allt annað. Krafa stéttarfélaganna er skýr, sambærilegar launahækkanir og aðrir viðsemjendur Sambands íslenskra sveitarfélaga hafa fengið, svo sem grunnskólakennarar, BHM og nú síðast leikskólakennarar.

16. júní 2014

SFR á jafnréttisráðstefnu Nordisk Forum 2014 í Malmö

Dagana 12. - 15. júní var haldin jafnréttisráðstefna Nordisk Forum í Malmö, en 27 fulltrúar úr hópi trúnaðarmanna og starfsmanna SFR sóttu hana. Á ráðstefnunni voru um 10.000 manns frá öllum Norðurlöndunum en einnig fleiri löndum. Yfirskrift ráðstefnunnar var New action - skilaboðin voru sterk, - við skulum meta þaðsem áunnist hefur en þörfin á að finna nýjar leiðir, tæki og tól í jafnréttisbaráttunni er mikil. Dagskráin var afar fjölbreytt og hlýddu fulltrúar SFR m.a. á fyrirlestra og umræður um launajafnrétti, valdaskiptingu heimsins, jafnréttismál á vinnumarkaði og umhverfismál út frá feminískum sjónarhóli svo eitthvað sé nefnt.

10. júní 2014

Fulltrúar SFR ræða opinbera stjórnsýslu á NSO ráðstefnu

Á ráðstefnu NSO í Svíþjóð eru stéttarfélög opinberra starfsmanna á Norðurlöndunum saman komin til þess að ræða góða opinbera stjórnsýslu og verðmæti hennar. Finnski sérfræðingurinn dr. Hanna Kuusela fjallaði þar meðal annars um um ráðgjafalýðræðið og hvernig og hvort það gerir ríkið óskilvirkt og hvort það dragi úr þekkingu innan stjórnsýslunnar.

06. júní 2014

Gönguklúbbur Lífeyrisdeildar SFR á Stokkseyri

Gönguklúbbur Lífeyrisdeildar SFR lauk gönguvetrinum með því að fara í heimsókn á Stokkseyri. Þar var tekið á móti hópnum með kurt og pí af tveimur göngufélögum sem eru svo lánsamir að eiga þar hús við ströndina. Fyrst sýndu þeir göngufélögum húsin sín sem voru ævintýri líkust, svo var farið niður í fjöruna og gengið meðfram fjörukambinum að veitingahúsinu Við fjöruborðið og þaðan eftir götunni tilbaka og áhugaverðir staðir skoðaðir á leiðinni.

05. júní 2014

Kjarasamningur SFV samþykktur

Félagsmenn SFR  og Sjúkraliðafélags Íslands sem starfa hjá fyrirtækum í Samtökum fyrirtækja í velferðarþjónustu hafa samþykkt nýjan kjarasamning sem félögin gerðu við Samtök fyrirtækja í velferðarþjónustu.

Kjarasamningurinn var samþykktur með rúmlega 92% greiddra atkvæða. Alls voru 576 á kjörskrá en af þeim kusu 356. Kjörsókn var rétt tæplega 62%.

 

31. maí 2014

Laxveiðileyfi til sölu í Norðurá fyrir gesti í Munaðarnesi

Félagsmönnum sem gista í Munaðarnesi á komandi sumri býðst að kaupa laxveiðileyfi í Norðurá og hafa til þess forgang til og með 2. júní. Eftir það opnast salan á alla félagsmenn BSRB. Hálfur dagur kostar kr. 3.500 og eru seldar tvær stangir á svæðið og er leyft að veiða á allt agn. Veiði hefst 9. júní og hefur ROM annan hvern dag til umráða/sölu á mót Eflingu stéttarfélagi. Veitt er frá 7.00 – 13.00 og/eða frá 16.00-22.00. 

22. maí 2014

Stofnun ársins valin

Rétt í þessu voru kynntar niðurstöður úr könnuninni Stofnun ársins og Fyrirtæki ársins 2014 í Hörpunni. Stofnanir ársins eru þrjár, hver í sínum stærðarflokki:

Sjálfsbjargarheimilið er sigurvegari í flokki stórra stofnana með fleiri en 50 starfsmenn.  Einkaleyfastofan er stofnun ársins í flokki meðalstórra stofnana þar sem starfsmenn eru 20-49.  Héraðsdómur Suðurlands bar sigur út býtum í flokki stofnana þar sem starfsmenn eru færri en 20.

Hástökkvarinn í ár, eða sú stofnun sem hækkaði sig mest á milli ára er Sýslumaðurinn á Blönduósi en hann hækkaði sig um heil 43 sæti.