Fréttir og greinar

17. september 2020

Skrifstofa Sameykis lokar kl. 15:30 í dag

Skrifstofu Sameykis verður lokað örlítið fyrr í dag vegna aðalfundar félagsins. Skrifstofan lokar kl. 15:30.

17. september 2020

Blað Sameykis á leiðinni til þín!

Blað Sameykis er nú á leiðinni til félagsmanna. Í blaðinu að þessu sinni er allt um Gott að vita námskeiðin okkar, ítarleg grein um stöðu efnahags og atvinnumála, umfjöllun um símennntun og viðtal við félagsmenn sem voru í nýju námi í opinberri stjórnsýslu á Bifröst síðastliðinn vetur, grein eftir Sonju Ýr Þorbergsdóttur formanns BSRB um styttinguna, niðurstöður úr ljósmyndasamkeppninni og margt fleira.

17. september 2020

Síðustu forvöð að skrá sig á spennandi námskeið!

Starfsmennt býður að venju upp á spennandi námskeið. Nú eru síðustu forvöð að skrá sig á námskeið um þrautseigju í lífi og starfi, breytingum og betri tímastjórnun í styttri vinnuvíku. Kíkið á glænýja og glæsilega vefsíðu Starfsmenntar.

16. september 2020

Vinningshafar í ljósmyndaleik

Blaðið blés til ljósmyndasamkeppni í sumar og bárust okkur fjölmargar skemmtilegar myndir að því tilefni. Myndirnar áttu að sýna orlofshúsin okkar eða umhverfi þeirra eða sýna fólk nýta sér aðra orlofskosti s.s. veiði- eða útilegukortið. Vinningsmyndirnar eru allar gullfallegar og lýsa skemmtilegum augnablikum hver á sinn hátt. Það er samt skemmtileg tilviljun að flestar verðlaunamyndirnar voru teknar á Eiðum. Haft hefur verið samband við vinningshafa og munu þeir fá að launum helgardvöl í orlofshúsum félagsins innanlands að eigin vali (utan
úthlutunartíma.)

15. september 2020

Raunfærnimat - eitthvað fyrir þig?

Fræðslusetrið Starfsmennt hefur tekið saman lista yfir þau raunfærnimatsverkefni sem eru í gangi hjá fræðslu- og símenntunarmiðstöðvum um allt land. Raunfærnimat getur mögulega stytt nám og verið fólki hvatning til að ljúka því.

11. september 2020

Samningur við RÚV undirritaður

Nýr kjarasamningur við RÚV var undirritaður í morgun en þar eru um fimmtíu félagsmenn Sameykis. Á miðvikudaginn í næstu viku verður haldinn kynningarfundur á vinnustaðnum og atkvæðagreiðsla í kjölfar hans.

01. september 2020

Sameyki harmar stöðu mála á Suðurnesjum

Sameyki stéttarfélag harmar þá stöðu sem upp er komin hjá félagsmönnum þess á Reykjanesi nú þegar Isavia og Fríhöfnin hafa sagt upp næstum 200 manns síðustu daga til viðbótar þeim sem áður höfðu fengið uppsagnir eða lækkað starfshlutfall.
Það er mikið áfall að stór fyrirtæki á borð við þessi tvö missi verkefni sín svo til á einu bretti. En það er hins vegar mikilvægt að þau sýni samfélagslega ábyrgð og komi til móts við starfsfólk sitt eins og kostur er meðan þetta tímabundna ástand varir. Mannauður hvers fyrirtækis er mikilvægur og sú þekking sem skapast hefur hjá starfsfólki tekur langan tíma að byggja upp aftur. Sameyki stéttarfélag hvetur Isavia og Fríhöfnina til að gera allt sem í þeirra valdi stendur til að halda ráðningarsambandi við starfsfólk sitt eins og kostur er.

01. september 2020

Námsstofur um styttingu vinnuvikunnar

Rétt í þessu var fyrsta námsstofa Sameykis um styttingu vinnuvikunnar að hefjast á Grettisgötunni. Um er að ræða fræðslu fyrir trúnaðarmenn um framkvæmd styttingarinnar, enda má eiga von á því að vinnan við styttinguna lendi á þeim að einhverju leyti. Námsstofunni er ætlað að búa trúnaðarmennina okkar betur undir þá vinnu. Á námsstofunni í dag voru 18 manns í salnum og 3 í fjarfundi en þessi námsstofa var sérstaklega ætluð trúnaðarmönnum sem starfa í skrifstofuvinnu á dagvinnutíma. Áætlað er að halda um 12 námsstofur í allt. Það er langt síðan trúnaðarmenn hafa komið í hús og ekki laust við að það sé ákveðin eftirvænting í loftinu. Það skal tekið fram að allra sóttvarna er gætt, fjarlægð milli fólks góð og nóg af spritti, grímum og hönskum.

31. ágúst 2020

Sóttvarnir á skrifstofu Sameykis

Að gefnu tilefni viljum við fullvissa fólk um að skrifstofa Sameykis er opin alla virka daga milli kl. 9-16. Vegna Covid veirunnar óskum við eftir að félagsfólk sem kemur í heimsókn gæti sérstakrar varúðar og komi ekki nema nauðsyn beri. Við bendum á að hægt er að finna haldgóðar upplýsingar á vef félagsins sameyki.is. Þar er hægt að afgreiða sig sjálfur með t.d. að bóka orlofshús og íbúðir ásamt kaupum á orlofstengdum tilboðum. Umsóknir í sjóði félagsins s.s. styrktar- og sjúkrasjóði og í starfsmenntasjóði er hægt að senda inn í gegnum mínar síður. Einnig má senda tölvupóst á sameyki@sameyki.is eða hringja í síma 525 8330.

24. ágúst 2020

Tryggjum öryggi fólks - hækkum atvinnuleysisbætur

Í tillögum BSRB er snúa að aðgerðum stjórnvalda í tengslum við Covid er lögð áhersla á að stjórnvöld stuðli samhliða að því að tryggja félagslegan stöðugleika sem og efnahagslegan. Meginmarkmið aðgerða ætti alltaf að vera að tryggja öryggi og heilsu fólks, sérstaklega í framlínustörfum, en einnig heilt yfir í vinnu og einkalífi. Þá er lögð áhersla á að gripið verði til markvissra aðgerða með jafnrétti að leiðarljósi til að tryggja afkomu fólks og að stjórnvöld gangi lengra í stuðningi við heimilin en nú hefur verið gert. Tillögur BSRB miða einnig að því að skapa aukna eftirspurn í hagkerfinu og tryggja heilbrigði, velsæld og framleiðni til lengri tíma.