Fréttir og greinar

15. október 2019

BSRB og ASÍ setja á fót rannsóknarstofnun

Fram kemur í frétt á vef BSRB í gær að BSRB og Alþýðusamband Íslands hafa ákveðið að setja á fót rannsóknarstofnun í vinnumarkaðsfræðum til að efla rannsóknir á sviði vinnumarkaðar, félags- og efnahagsmála. Norræn heildarsamtök á vinnumarkaði starfrækja mörg hver slíkar stofnanir og er því sérstakt ánægjuefni að íslenska verkalýðshreyfingin stígi nú þetta stóra skref.

09. október 2019

Trúnaðarmenn Sameykis nema fræðin

Fyrsta hluta trúnaðarmannafræðslu á vegum Félagsmálaskóla Alþýðu er nú nýlokið, en við bjóðum trúnaðarmönnum upp á að taka alls 6 hluta af trúnaðarmannanámskeiðum. Þátt tóku rúmlega tuttugu trúnaðarmenn sem létu vel að námsefninu. Námskeiðið stendur yfir í tvo daga og var fyrri dagurinn nýttur til þess að fjalla um vinnumarkaðinn, þjóðfélagið og stéttarfélögin og seinni daginn var trúnaðarmaðurinn, hlutverk hans og staða krufin til mergjar.

08. október 2019

Gott að vita námskeið eru alls konar!

Hetjur hafsins eru í Sameyki! Við hittum þessar ofurhressu félagskonur á sjósundsnámskeiði í Nauthólsvíkinni í gær. Þær óðu án hiks út í sjó og stefndu til hafs undir dyggri leiðsögn Benedikts Hjartarsonar. Það er sko hægt að læra alls konar á Gott að vita námskeiðum Sameykis ;)

08. október 2019

Fundir hjá sáttasemjara

Fulltrúar ríkissáttasemjara funduðu með samninganefndunum í gær eins og fram hefur komið. Þar voru fulltrúar BSRB og samninganefndir ríkis, Reykjavíkurborgar og Sambands íslenskra sveitarfélaga. Rætt var um vinnu- og fundatilhögun næstu daga en ekki var farið í einstök efnisatriði að svo stöddu. Næstu fundir verða boðaðir fljótlega, enda flestir sammála um að mikilvægt sé að skrið komist á viðræðurnar.

07. október 2019

Ríkissáttasemjari boðar fund

Ríkissáttasemjari hefur boðað fulltrúa BSRB á fundi vegna samingaviðræðna við ríki, Samband íslenskra sveitarfélaga og Reykjavíkurborg. Fundirnir verða allir nú síðdegis. Ríkissáttasemjari hefur nú legið undir feldi undanfarna daga en eins og kunnugt er var viðræðunum við alla þessa aðila vísað þangað í lok síðasta mánaðar. Viðræður höfðu fram að því gengið skammarlega hægt og það er von okkar að nú fari þær loks af stað í átt að raunverulegum markmiðum okkar um styttingu vinnuvikunnar, jöfnun launa milli markaða og annrra mikilvægra mála.

06. október 2019

Haustfagnaður lífeyrisdeildar

Haustfagnaður lífeyrisdeildar Sameykis verður haldinn 30. október næstkomandi í húsnæði Garðyrkjufélagsins, Síðumúla 1. Boðið verður upp á svið, hangikjöt og uppistand. Nauðsynlegt er að skrá sig.

03. október 2019

Viðræður við Strætó og Faxaflóahafnir að komast í gang

Viðræðum við þrjá stærstu viðsemjendur Sameykis hefur nú verið vísað til sáttasemjara og enn hefur enginn fundur verið boðaður á þeim bæ. Við höfum lagt áherslu á að samningar náist sem fyrst enda hafa þeir verið lausir nú í rúmt hálft ár. Það var okkar mat að ekki myndi þokast lengra í þeim endalausu viðræðum sem við höfðum átt við fulltrúa ríkis, Reykjavíkurborgar og Sambands íslenskra sveitarfélaga. Meðan ríkissáttasemjari liggur undir feldi mun félagið halda áfram með viðræður við Isavía og Fríhöfnina auk þess sem fundir hafa verið boðaðir með Strætó og Faxaflóahöfnum.

01. október 2019

Orlofshús í vetur

Í morgun var opnað fyrir bókanir á orlofshúsum Sameykis innanlands fram til loka febrúar 2020. Rafrænar bókanir á Orlofsvefnum.

30. september 2019

Kjaradeilu við sveitarfélögin einnig vísað til ríkissáttasemjara

Aðildarfélög BSRB, þar á meðal Sameyki, sem eiga í kjarasamningsviðræðum við Reykjavíkurborg og Samband íslenskra sveitarfélaga hafa vísað viðræðunum til ríkissáttasemjara. Í síðustu viku slitnaði upp úr viðræðum við ríkið og í framhaldinu hófst ferli aðildarfélaganna um vísun deilnanna til ríkissáttasemjara.

25. september 2019

Deilu Sameykis og ríkis vísað til ríkissáttasemjara

Samninganefnd Sameykis hefur í dag tekið ákvörðun um að vísa kjaradeilu við fjármálaráðherra fyrir hönd ríkissjóðs til ríkissáttasemjara. Formenn og fulltrúar aðildarfélga BSRB hittust á fundi samningseininga í dag og réðu ráðum sínum vegna þeirrar stöðu sem upp er komin í kjarasamningsviðræðum við ríkið. En eins og kunnugt er slitnaði upp úr viðræðum í gær. Það var sameiginleg ákvörðun þeirra félaga sem eru með samninga við ríkið að vísa deilunni til ríkissáttasemjara en þau félög sem eru með samninga við Reykjavíkurborg og Samband íslenskra sveitarfélaga munu á næstu dögum gera lokatilraun til að ná samningum áður en þeim deilum verður einnig vísað sömu leið.