Fréttir og greinar

28. apríl 2015

Kynningarfundir fyrir sjóðfélaga hjá LSR

Árlega heldur LSR kyningar- og samráðsfund fyrir lífeyrisþega og maka þeirra og er hann 5. maí þetta árið. Þá eru einnig haldnir kynningarfundir fyrir virka sjóðfélaga A- og B-deild LSR og verða þeir haldnir 12. og 13. maí og hægt að velja um fjórar tímasetningar. Sjá nánar um fundina og skráningu hér.

14. apríl 2015

Innanríkisráðherra fellst á að funda með SFR um uppsagnir starfsfólks á Samgöngustofu

Í kjölfar þess að SFR gerði alvarlegar athugasemdir við þær aðferðir sem viðhafðar voru við uppsagnir starfsfólks á Samgöngustofu þá hefur innaríkisráðherra fallist á að hitta forsvarsmenn SFR. Á fundinum mun SFR halda á lofti því sjónarmiði að um algjörlega ólöglegar uppsagnir hafi verið að ræða og mun félagið áfram gera kröfu um að uppsagnirnar verði dregnar til baka hið fyrsta.

10. apríl 2015

SFR mótmælir uppsögnum

SFR stéttarfélag í almannaþjónustu mótmælir harðlega þeim aðferðum sem viðhafðar voru við uppsagnir starfsfólks á Samgöngustofu fyrir skemmstu og gerir þá skýlausu kröfu að uppsagnirnar verði dregnar til baka hið fyrsta. Félagið hefur sent bréf til forstjóra Samgöngustofu með formlegri kröfu þess efnis að uppsagnirnar verði dregnar til baka enda brjóti þær gegn lögum um hópuppsagnir nr. 63 frá árinu 2000, þar sem mælt er fyrir um skýra og fortakslausa samráðsskyldu atvinnurekanda.

08. apríl 2015

Umsóknarfrestur fyrir sumarið 2015 rennur út í dag!

Lokað verður fyrir umsóknir á netinu á miðnætti í dag 8. apríl. Úthlutað verður á föstudeginum 10. apríl og þá ættu allir að fá svör í tölvupósti hvort sem það er já eða nei. MIkilvægt er að umsækjendur kíkji í ruslhólfið ef það eru síur á pósthólfunum hjá viðkomandi.

30. mars 2015

Svik stjórnvalda og lögbrot við uppsagnir

Árni Stefán Jónsson formaður SFR stéttarfélags í almannaþjónustu skrifar á www.visir.is

Fimmtán starfsmönnum Samgöngustofu hefur verið sagt upp. Í þeirra hópi voru sex félagsmenn SFR og er meðalaldur þeirra 59 ár. Einum býðst endurráðning á lakari kjörum. Kjör þriggja félagsmanna voru skert og fimmtán félagsmenn SFR voru færðir til í starfi. Þá var einnig kynnt á starfsmannafundi að ekki yrði ráðið í 8 stöður sem vitað er að losni á árinu. Sjá greinina í heild hér.

27. mars 2015

Aðalfundur SFR

Aðalfundur félagsins var haldinn miðvikudaginn 25. mars síðast liðinn og var afar góð mæting á fundinn. Formaður félagsins Árni Stefán Jónsson rakti viðburði og áherslur síðast liðins ár og framkvæmdastjórinn Þórarinn Eyfjörð fór yfir reikninga og fjárhagsáætun. Að venju var tilkynnt um val á trúnaðarmanni ársins en að þessu sinni hlaut Ólafur Hallgrímsson heiðurinn. Ólafur hefur um árabil setið í stjórn félagsins og verið formaður stjórnar orlofssjóðs og ein helsta driffjöður félagsins í orlofsmálum og er hann vel að heiðrinum kominn.

26. mars 2015

Sameiginleg kröfugerð þriggja félaga lögð fram

Í dag lögðu samninganefndir SFR stéttarfélags í almannaþjónustu, Sjúkraliðafélags Íslands og Landssambands lögreglumanna fram sameiginlega kröfugerð félaganna í komandi kjarasamningum. Félögin þrjú eru stærstu félögin innan BSRB sem semja við ríkið og hópurinn sem samið verður fyrir telur rúmlega 5200 manns.

25. mars 2015

Aðalfundur SFR kl. 17 í dag - Félagsmenn hvattir til að mæta

Aðalfundur SFR stéttarfélags í almannaþjónustu verður haldinn 25. mars næstkomandi, kl 17:00 að Grettisgötu 89. Félagsmenn eru hvattir til að koma og kynna sér málefni félagsins. Boðið verður upp á léttan kvöldverð.

20. mars 2015

Eingreiðsla 1. apríl 2015

Félagsmenn SFR sem starfa hjá ríki, sjálfseignastofnunum sem greiða eftir kjarasamningi SFR og ríkisins og Samtökum fyrirtækja í velferðaþjónustu fá samningsbundna eingreiðslu þann 1. apríl 2015.

Eingreiðslan er 20.000 kr. miðað við fullt starf í febrúar 2015. Þeir sem eru í hlutastarfi og/eða störfuðu hluta úr febrúarmánuði fá hlutfallslega greiðslu.

Eingreiðslan nær til allra starfsmanna í föstu ráðningarsambandi utan þeirra sem eru í launalausu leyfi.

19. mars 2015

Samstarf í kjaraviðræðum

Þrjú stærstu félögin innan BSRB sem semja við ríkið hafa tekið höndum saman og leggja fram sameiginlega kröfugerð í komandi kjarasamningsviðræðum. Þetta eru SFR stéttarfélag í almannaþjónustu sem semur fyrir um 3500 starfsmenn, Landssamband lögreglumanna með rúmlega 600 starfsmenn og Sjúkraliðafélag Íslands með um 1100 starfsmenn hjá ríkinu.