Fréttir og greinar

14. mars 2016

BSRB skoðar aðkomu að íbúðafélagi

BSRBmerkigott Stjórn BSRB hefur nú til skoðunar hvort bandalagið mun koma að stofnun íbúðafélags ásamt Alþýðusambandi Íslands (ASÍ). Félagið mun verða leigufélag sem rekið verður án hagnaðarsjónarmiða. Skýrast mun á næstu vikum hvort, og þá hvernig, BSRB mun taka þátt í stofnun íbúðafélagsins, segir á heimasíðu BSRB.

11. mars 2016

Orlofsmöguleikar - nýjung

SFR félagar geta nú keypt gjafabréf að andvirði 30.000 upp í pakkaferðir með Úrval Útsýn. Um er að ræða t.d. ferðir til Almería á Spáni, Mallorca, Kanaríeyja og ferðir Úrvalsfólks. Hver félagsmaður getur keypt allt að tvo gjafabréf á ári. Gjafabréfin er hægt að kaupa á orlofsvef félagsins undir liðnum ávísanir. Á bréfunum er kóði sem notaður er þegar ferðin er bókuð, en nota má tvö bréf í hverja bókun fyrir fjölskyldu.
Hvert gjafabréf kostar 20.000 kr. (andvirði 30.000 kr.)

09. mars 2016

Verum örugg í vinnunni - nýr bæklingur um áreitni og ofbeldi

Allir eiga rétt á því að starfsumhverfi þeirra einkennist af gagnkvæmri virðingu í samskiptum. Í því felst að starfsmenn eiga rétt á því að njóta skilyrðislausrar verndar gegn kynbundinni og kynferðislegri áreitni og öðru ofbeldi á vinnustað. Nú er kominn út bæklingur þar sem farið er yfir ýmis atriði tengt kynbundinni og kynferðislegri áreitni og ofbeldi á vinnustöðum. Að bæklingnum standa ASÍ, BHM, BSRB, KÍ, Jafnréttisráð og Jafnréttisstofa. Hann kom út 8. mars, á alþjóðlegum baráttudegi kvenna og kynnti Sonja Þorbergsdóttir lögfræðingur BSRB hann m.a. á hádegisverðarfund bandalaganna á Grand Hótel Reykjavík.

07. mars 2016

Stutt nám með starfi

Flestir hafa nóg að gera í því að stunda vinnu, sjá um fjölskyldu og sinna áhugamálum. Það er þó mikilvægt að gefa sér tíma til að huga að símenntun og bæta við þekkingu en þannig styrkjum við stöðu okkar á vinnumarkaði. Félagsmenn eru hvattir til að kynna sér hvað er á döfinni hjá Starfsmennt á næstu vikum en nánari upplýsingar er að finna á vefnum okkar, www.smennt.is. Nám og þjónusta Starfsmenntar er án endurgjalds fyrir félagsmenn SFR.

07. mars 2016

Páskaeggjabingó

Páskaeggjabingó SFR og St.Rv. verður haldið laugardaginn 12. mars kl 14-16 að Grettisgötu 89, 1. hæð. Hvert spjald kostar 400 kr. í peningum, EKKI er hægt að greiða með greiðslukortum. Húsið opnar kl. 13:30. Félagsmenn og fjölskyldur þeirra velkomnir en athugið að mögulega þarf að takmarka fjöldann í húsið, því er mikilvægt að koma tímanlega. Húsið opnar kl. 13:30.

04. mars 2016

Nýr orlofsmöguleiki Kiðjaberg í Grímsnesi

Nýtt hús hefur bæst við úrval orlofshúsa fyrir félagsmenn SFR. Húsið er á Kiðjabergi við Grímsnes og er 90 fm að stærð + gestahús sem er 20 fm. Gistiaðstaða í aðalhúsi er fyrir 6-8 og 2 í gestahúsi. Stór verönd er í kringum húsin en þar er ekki heitur pottur, en stutt í sundlaugar í nágrenninu sem og vinsæla golfvelli.

03. mars 2016

Örugg í vinnunni?

Örugg í vinnunni? Það er yfirskrift hádegisverðarfundar sem BSRB, Alþýðusamband Íslands, BHM, BSRB, Kennarasamband Íslands, Jafnréttisstofa og Jafnréttisráð standa fyrir þriðjudaginn 8. mars. Þar verður fjallað um kynbundna og kynferðislega áreitni og ofbeldi á vinnustöðum. Fundurinn er haldinn í tilefni alþjóðlegs baráttudags kvenna þann sama dag.

02. mars 2016

Orlofsblað SFR í vinnslu

Orlofsblað félagsins er nú á lokametrunum í vinnslu og mega félagsmenn búast við því í lok næstu viku. Við minnum á að það getur verið afar sniðugt að geyma Orlofsblaðið þar sem í því er að finna allar mögulegar upplýsingar um orlofshúsin okkar og ítarlegar leiðbeiningar um úthlutanir og bókanir.

Opnað verður fyrir umsóknir til þess að sækja um orlofshús innanlands í sumar 14. mars. Frestur til þess að sækja um verður til og með 13. apríl. Sérstakt umsóknareyðublað fyrir félagsmenn lífeyrisdeildar mun fylgja orlofsblaðinu.

Opnað verður fyrir bókanir dagleiguhúsa innanlands 27. apríl, þá geta allir sótt um.

Opnað verður fyrir sumarleigu í Kaupmannahöfn 29. mars.

02. mars 2016

Hvernig líður þér í vinnunni?

Könnun SFR um val á Stofnun ársins og launakönnun sem gerð er í samstarfi við St.Rv. og VR hefur nú verið send út. Í könnuninni er m.a. spurt líðan starfsmanna, aðbúnað á vinnustað, samskipti og traust til stjórnanda. Þannig velja starfsmenn sjálfir þá stofnun sem best stendur sig gagnvart starfsmönnunum og hlýtur hún titilinn Stofnun ársins 216. Í könnunni er einnig spurt um laun og hvetjum við félagsmenn til þess að svara þeim spurningum vandlega því niðurstöðurnar gefa okkur mikilvægan samanburð og upplýsingar um launaþróun milli kjarasamninga. Það er afar mikilvægt að sem allra flestir svari könnuninni svo niðurstöðurnar verði sem marktækastar, svo er einnig möguleiki á happdrættisvinningi fyrir þá sem svara. Taktu þátt - það er í þína þágu.

01. mars 2016

Andstaða við einkavæðingu

Stjórn BSRB hefur mótmælt harðlega áformum heilbrigðisráðherra um einkavæðingu heilsugæslustöðva og tekur SFR stéttarfélag í almannaþjónustu heilshugar undir það. Það ætti að vera skýrt markmið stjórnvalda að allur mögulegur „hagnaður“ af rekstri heilbrigðisþjónustu renni beint til frekari uppbyggingar þjónustunnar en ekki í vasa einkaaðila. Heilsa fólks og heilbrigði getur aldrei orðið eins og aðrar vörur á markaði.