Haldinn var morgunverðarfundur með trúnaðarmönnum Sameykis í Félagamiðstöðinni í BSRB-húsinu nú í morgun. Fundurinn var einnig gagnvirkur með fjarfundarbúnaði fyrir þá trúnaðarmenn sem ekki komust á staðinn. Meðal umræðuefna var fyrirætlun ríkisstjórnarinnar að fella niður áminningarskylduna í lögum um réttindi og skyldur opinberra starfsmanna. Einnig var erindi um starfsmatið sem Ingólfur Björgvin Jónsson, deildarstjóri kjaradeildar flutti.

Kári Sigurðsson, formaður Sameykis.

Kári Sigurðsson, formaður Sameykis, stjórnaði fundinum og las upp bréf sem Sameyki sendi í samráðsgátt stjórnvalda vegna málsins. Hann sagði að stjórnendur vinnustaða færu stundum ekki eftir áminningarferlinu sem skapaði fjölbreyttan vanda. Þá sagði Kári að dæmi væru um að stjórnendur settu sér sínar eigin reglur á vinnustöðum þar sem lögum um réttindi og skyldur opinberra starfsmanna væri ekki fylgt og því væri vandinn oftar en ekki stjórnendavandi. „Við sjáum ekki að stjórnendur verði betri stjórnendur ef áminningarskyldan yrði afnumin,“ sagði Kári.

Þá sagði hann að orðræða um að opinberir starfsmenn nytu óeðlilegs starfsöryggis hefði fengið að grassera og umræðan ítrekað verið dregin á villigötur. „Slík umræða skaðar ímynd starfsfólks sem heldur uppi grunnstoðum samfélagsins og þannig er á sama tíma vegið að trausti almennings til hins opinbera. Nú er mál að linni, raunverulegi vandinn sem ríkið stendur frammi fyrir er mannekla og ættu stjórnvöld að beina kröftum sínum að því að bæta starfsumhverfi, laða að og halda í starfsfólk, fremur en að gera atlögu að réttindum þess.“

Ingólfur Björgvin Jónsson, deildarstjóri kjaradeildar.

Ingólfur Björgvin hélt erindi um starfsmatið og skýrði frá að það væri kerfi sem metur störf á skipulegan og samræmdan hátt.

„Starfsmatið byggist á fjórum meginþáttum sem lýsa eðli og kröfum starfsins. Fyrst er metin þekking og færni, þar sem horft er til menntunar, reynslu og hæfni í samskiptum, hugsunar og líkamlegs starfs. Næst kemur álag, sem felur í sér mat á hugrænu, líkamlegu og tilfinningalegu álagi, auk þess hversu mikils frumkvæðis og sjálfstæðis starfið krefst. Þriðji þátturinn er ábyrgð, þar sem metið er hvaða ábyrgð starfsmaður ber á fólki, fjármálum, eignum og upplýsingum,“ útskýrði Ingólfur.

Hann sagði að vinna væri í gangi hjá félaginu við að skoða öll störf hjá Reykjavíkurborg og spegla þau við starfsmatið. „Skoða þarf vinnuaðstæður, svo sem hvort þær séu erfiðar eða hættulegar. Allir þessir þættir mynda saman stigakerfi sem endurspeglar heildarmatið fyrir hvert starf. Það er mjög mikilvægt að við fylgjumst með hvenær störf eru endurmetin þar sem þau eiga þá að fá hækkun í samræmi við það. Ef t.d. starf þyngist og starfslýsingin breytist eru komnar forsendur fyrir endurmati starfsins,“ sagði Ingólfur. Nokkar umræður sköpuðust um kosti og galla kerfisins meðal trúnaðarmanna.

Jakobína Þórðardóttir, deildarstjóri félagsdeildar, minnti fundargesti á þátttöku í mannauðskönnuninni Stofnun ársins sem Gallup sendir út. Veitir könnunin starfsfólki og stjórnendum stofnana og vinnustaða tækifæri til að hafa áhrif á stjórnun, mannauðsstefnu og mótun vinnustaða sinna.

Fundinum lauk með því að formaður Sameykis sagði frá að vinna laganefndar væri í gangi, sem fælist í endurskoðun laganna, og yrði hún kynnt á næstu misserum