Kosning trúnaðarmanna
Kosning trúnaðarmanna
Kosið er til trúnaðarmanns í maí á oddatöluári og gildir kjörið í tvö ár. Trúnaðarmaður er fulltrúi starfsfólks gagnvart atvinnurekanda og Sameyki. Kosning fer fram í samráði við Sameyki og trúnaðarmaður fær kjör sitt og umboð staðfest af félaginu.
Sameyki leggur áherslu á að trúnaðarmenn starfi á öllum vinnustöðum. Þar sem fimm eða fleiri félagar starfa er hvatt til þess að kjósa trúnaðarmann. Allir félagar í Sameyki geta boðið sig fram. Hlutverk trúnaðarmanns er meðal annars að gæta hagsmuna félaga á vinnustaðnum, miðla upplýsingum, fylgja eftir kjarasamningum og aðstoða við ágreiningsmál.
Starfið er lærdómsríkt og gefandi og veitir innsýn í mannauðsmál, starfsemi vinnustaða og stéttarfélaga. Trúnaðarmenn hafa aðgang að fræðslu og þjálfun sem nýtist bæði í starfi og daglegu lífi.
Núverandi kjörtímabil trúnaðarmannaráðs er frá 31. maí 2025 til 31. maí 2027.
Framkvæmd kosninga
Kjörgögn fyrir kosningu trúnaðarmanna eru send öllum trúnaðarmönnum í vefpósti í apríl á oddatöluári. Félagar sem vilja fá gögnin send geta haft samband við tengilið trúnaðarmanna á netfangið kristin@sameyki.is.
Fráfarandi trúnaðarmaður skipar umboðsmann og sér um að auglýsa væntanlega kosningu á vinnustaðnum. Auglýsingin skal vera sýnileg í sameiginlegu rými og má einnig senda í tölvupósti til starfsfólks. Þar kemur fram nafn umboðsmanns og hvatning til félaga að bjóða sig fram.
Allir félagar á vinnustaðnum geta boðið sig fram til trúnaðarmanns. Ef fleiri en einn eru í framboði fer kosning fram á vinnustaðnum. Áhugasamir félagar hafa samband við umboðsmann til að skrá framboð.