Kári Sigurðsson, formaður Sameykis, gagnrýnir harðlega áform ríkisstjórnar Kristrúnar Frostadóttur undir forystu Daða Más Kristóferssonar, fjármálaráðherra, um breytingar á mannauðsmálum í ríkisrekstri í nýjum pistli á Vísi. Í pistlinum fjallar Kári meðal annars um hugmyndir um að afnema áminningarskyldu opinberra starfsmanna og varar við því að rýra réttindi launafólks í nafni skilvirkni. Hann segir að slíkar aðgerðir missi marks við raunverulegan vanda stjórnsýslunnar.

„Lausnin felst ekki í því að veikja réttindi starfsfólks, heldur í faglegri stjórnun, skýrum ferlum og raunverulegu samráði á vinnustöðum hins opinbera,“ segir Kári í pistlinum.

Hann bendir jafnframt á að óstöðugleiki, tíðar skipulagsbreytingar og skortur á mannlegum vinnubrögðum hafi neikvæð áhrif á starfsanda og gæði opinberrar þjónustu. Að mati Kára þurfi umbætur í mannauðsmálum að byggja á trausti, ábyrgð og fagmennsku, en ekki á einföldum lagabreytingum sem veikja stöðu starfsfólks með afregluvæðingu vinnumarkaðarins.

Pistillinn er innlegg í áframhaldandi umræðu um stefnu ríkisstjórnarinnar í mannauðsmálum og framtíð opinberrar stjórnsýslu.