BSRB hefur skilað umsögn um fjárlagafrumvarp ríkisstjórnarinnar fyrir árið 2026 og lýsir þar miklum vonbrigðum með að frumvarpið boði áframhaldandi niðurskurð í opinberri þjónustu í stað þess að styrkja tekjugrunn ríkissjóðs.

Bandalagið fagnar áherslum um fjölgun hjúkrunarrýma, aukna geðheilbrigðisþjónustu, stuðning við börn og ungmenni í vanda, aukin framlög til löggæslu og öryggismála auk vegabóta en bendir hinsvegar á að undirliggjandi stefna fjárlagafrumvarpsins sé aðhald og sparnaður á kostnað almannaþjónustunnar. Í umsögninni segir enn fremur að efnahagsstefna undanfarinna ríkisstjórna hafi einkennst af veikingu tekjustofna þegar verulegar lækkanir voru gerðar á tryggingagjöldum, bankaskatti, fjármagnstekjuskatti, erfðafjárskatti og tekjuskatti einstaklinga. „Áhrif þessara skattalækkana nema tugum milljarða króna árlega.“

„Mikilvægt er að styrkja tekjugrunn ríkissjóðs, en þess í stað boðar frumvarpið óbreytta efnahagsstjórn með áframhaldandi niðurskurði sem mun gera mönnun þjónustunnar enn erfiðari og grafa undan velferð og öryggi íbúa landsins,“ segir í umsögninni.

BSRB bendir á að rót efnahagsvandans liggi ekki í útgjöldum til opinberrar þjónustu heldur í afleiðingum heimsfaraldurs, náttúruhamfara og bankahruns. Bandalagið hvetur ríkisstjórnina til að velta vaxtakostnaði ríkissjóðs ekki yfir á launafólk og notendur almannaþjónustunnar.

Í umsögninni er harðlega mótmælt boðuðum breytingum á mikilvægum tilfærslukerfum eins og barnabótum, vaxtabótum og atvinnuleysistryggingum, sem BSRB segir veikja stöðu launafólks og bitna mest á tekjulægri hópum.

„Það er ámælisvert að svo veigamiklar breytingar séu gerðar án samráðs við aðila vinnumarkaðarins og án þess að greiningar á áhrifum þeirra liggi fyrir,“ segir enn fremur í umsögninni.

BSRB varar einnig við því að fjárlagafrumvarpið feli í sér raunverulegan niðurskurð á heilbrigðisþjónustu þar sem sjúkrahús og heilsugæsla eigi að spara rúma þrjá milljarða með svokölluðum sértækum aðgerðum.

Hægt er að lesa umsögn BSRB í heild sinni hér.