Trúnaðarmannaráð SFR fundaði í gær og fór Árni Stefán Jónsson formaður SFR þar meðal annars ítarlega yfir gang kjaraviðræðnanna. Þó nokkrir fundir hafa þegar verið með saminganefnd ríkisins og samstarfsfélögum SFR, en SFR er í samstarfi við Landssamband lögreglumanna og Sjúkraliðafélag Íslands í kjarasamningsviðræðum við ríkið.

Á fundinum var Guðmundur Hörður Guðmundsson fyrrverandi formaður Landverndar einnig með afar fróðlegt erindi um auðlindir og arðinn af þeim, en hann vill tryggja að það sé þjóðin sem njóti góðs af arðinum af auðlindunum en ekki einstaklingar eða fyrirtæki. Þá voru fulltrúar SFR á þing BSRB í haust valdir og minnt var á að trúnaðarmannakosning stendur enn yfir á vinnustöðum, en henni lýkur 31. maí næstkomandi.